លោក ត្រាំ គំរាមកម្ទេចអ៊ីរ៉ង់ ខណៈក្រុមអ្នកការទូតកំពុងជំរុញឱ្យមានកិច្ចព្រមព្រៀងនៅអង្គការសហប្រជាជាតិ
ប្រធានាធិបតីអាមេរិក លោក ដូណាល់ ត្រាំ បានព្រមានកាលពីថ្ងៃអង្គារថា លោកអាចនឹងកម្ទេចប្រទេសអ៊ីរ៉ង់ចោលទាំងស្រុង ប្រសិនបើគ្មានកិច្ចព្រមព្រៀង ដើម្បីបញ្ចប់សង្គ្រាម ប៉ុន្តែលោកក៏បានលើកឡើងដែរថា កិច្ចព្រមព្រៀងមួយអាចនឹងកើតឡើងក្នុងពេលឆាប់ៗនេះ ចំពេលដែលមានកិច្ចខិតខំប្រឹងប្រែងផ្នែកការទូតនៅអង្គការសហប្រជាជាតិ។ នេះបើតាមសេចក្តីរាយការណ៍របស់ទីភ្នាក់ងារព័ត៌មានរ៉យទ័រ កាលពីថ្ងៃអង្គារ។
លោក ត្រាំ បានថ្លែងទៅកាន់មហាសន្និបាតអង្គការសហប្រជាជាតិ នៅទីក្រុងញូវយ៉កថា លោកមានការសម្រេចចិត្តដ៏សំខាន់មួយដែលត្រូវធ្វើ។
សាររបស់លោកបានសង្កត់ធ្ងន់ថា តើនឹងមានកិច្ចព្រមព្រៀងមួយជាមួយអ៊ីរ៉ង់ ដែលអនុញ្ញាតឱ្យពួកគេកសាងឡើងវិញ និងបង្កើតប្រទេសមួយដ៏អស្ចារ្យជាងពេលណាៗទាំងអស់ដែរឬយ៉ាងណា?… ឬមួយលោកគួរតែបំផ្លាញសាធារណរដ្ឋអ៊ីស្លាមនេះចោលទាំងស្រុងនិងធ្វើយ៉ាងឆាប់រហ័ស ដោយមិនផ្តល់ឱកាសឱ្យពួកគេសម្លាប់ និងបំផ្លាញជីវិតមនុស្ស ព្រមទាំងប្រទេសផ្សេងៗបានទៀតឡើយ។
ទោះបីជាយ៉ាងណា ក្នុងសេចក្តីថ្លែងការណ៍មួយកាលពីថ្ងៃអង្គារ កងកម្លាំងប្រដាប់អាវុធរបស់ប្រទេសអ៊ីរ៉ង់បានច្រានចោលការលើកឡើងរបស់លោក ត្រាំ នៅឯអង្គការសហប្រជាជាតិ ហើយថា នេះគ្រាន់តែជា “ការឃោសនា” ប៉ុណ្ណោះ ដោយបានបញ្ជាក់ថា ការឆ្លើយតបរបស់អ៊ីរ៉ង់ គឺ “ការត្រៀមខ្លួនជាស្រេចពេញលេញ ដើម្បីវាយប្រហារយ៉ាងធ្ងន់ធ្ងរ កម្ទេចចោល និងតាមរបៀបដែលមិនអាចស្មានទុកជាមុនបាន ទៅលើក្រុមអ្នកឈ្លានពាន”។
ក្រៅពីវោហាសាស្ត្រដ៏ក្តៅគគុកនេះ កិច្ចពិភាក្សានៅតែបន្ត ដើម្បីព្យាយាមបញ្ចប់ជម្លោះ ដែលមានរយៈពេលជិត ៧ ខែមកនេះ ដែលបានចាប់ផ្តើមឡើងដោយការវាយប្រហាររួមគ្នារវាងសហរដ្ឋអាមេរិក និងអ៊ីស្រាអែល និងបានបណ្តាលឱ្យមនុស្សរាប់ពាន់នាក់បាត់បង់ជីវិត ធ្វើឱ្យតម្លៃប្រេងកើនឡើង និងទាញប្រទេសជិតខាងឱ្យចូលរួមក្នុងជម្លោះនេះផងដែរ។
លោក ស្ទីវ វីតខហ្វ (Steve Witkoff) ជាប្រេសិតសហរដ្ឋអាមេរិក បានបង្ហោះសារតាមបណ្តាញសង្គមទ្វីតធើថា សហរដ្ឋអាមេរិក និងអ៊ីរ៉ង់ បានបើកកិច្ចពិភាក្សាដ៏យូរមួយកាលពីថ្ងៃអង្គារ នៅក្រៅកិច្ចប្រជុំមហាសន្និបាតអង្គការសហប្រជាជាតិ ដោយមានការចូលរួមពីអ្នកសម្របសម្រួល ដែលត្រូវនាំសារចុះឡើងរវាងភាគីទាំងពីរពេញមួយថ្ងៃ។
លោក វីតខហ្វ បានបន្ថែមថា លោកសង្ឃឹមថា ការពិភាក្សានៅថ្ងៃអង្គារនឹង “បង្ហាញឱ្យឃើញក្នុងន័យស្ថាបនា និងការសន្យា”។
លោក ត្រាំ ក៏បានជួបជាមួយមេដឹកនាំនៃបណ្តាប្រទេសនៅមជ្ឈិមបូព៌ា ដែលមានបំណងចង់ស្តារការដឹកជញ្ជូនតាមច្រកសមុទ្រហ័រមូស (Strait of Hormuz) ឡើងវិញ ជាផ្លូវដឹកជញ្ជូនប្រេង និងឧស្ម័នដែលមានចំណែកមួយភាគប្រាំនៃការដឹកជញ្ជូនប្រេងសកលលោកមុនពេលមានសង្គ្រាម ប៉ុន្តែប្រទេសនៅមជ្ឈិមបូព៌ាមានការប្រុងប្រយ័ត្នចំពោះការផ្តល់អំណាចច្រើនពេកដល់ប្រទេសអ៊ីរ៉ង់ ដែលជាគូប្រជែងដ៏យូរលង់របស់ពួកគេ។
ប្រទេសជាច្រើនដែលមានទីតាំងមូលដ្ឋានយោធាអាមេរិកធំៗ បានរងការវាយប្រហារជាបន្តបន្ទាប់ពីសំណាក់ប្រទេសអ៊ីរ៉ង់ អំឡុងពេលនៃសង្គ្រាម។
ខណៈពេលជួបជាមួយមេដឹកនាំទាំងនោះ លោក ត្រាំ បាននិយាយថា ស្ថានភាពជាមួយប្រទេសអ៊ីរ៉ង់អាចនឹងបញ្ចប់ភ្លាមៗ បន្ទាប់ពីការបោះឆ្នោតពាក់កណ្តាលអាណត្តិ (នៅថ្ងៃទី ៣ ខែវិច្ឆិកា) ឬអាចនឹងមុននោះ។ ប៉ុន្តែលោកហាក់បង្ហាញភាពមិនប្រាកដប្រជា ហើយថា មិនអាចដឹងជាមុនបានឡើយ។
ការធ្វើសកម្មភាពផ្នែកការទូតនេះ កើតឡើងស្របពេលដែលលោក ត្រាំ កំពុងប្រឈមមុខនឹងសម្ពាធជុំវិញបញ្ហាជាច្រើន រួមមាន ការកើនឡើងនៃតម្លៃថាមពលនៅក្នុងប្រទេស ជម្លោះក្នុងតំបន់ដែលកំពុងរីករាលដាលកាន់តែខ្លាំងនៅក្រៅប្រទេស និងការបោះឆ្នោតពាក់កណ្តាលអាណត្តិដែលនឹងមកដល់ក្នុងរយៈពេល ៦ សប្តាហ៍ទៀត ដែលអាចនឹងផ្លាស់ប្តូរស្ថានភាពនយោបាយរបស់លោក។
មិនថាការចរចានាំឱ្យមានកិច្ចព្រមព្រៀង ឬសង្គ្រាមកាន់តែរីករាលដាលខ្លាំងជាងមុននោះទេ វាសុទ្ធតែបង្កផលប៉ះពាល់ដល់ទីផ្សារប្រេងពិភពលោក សន្តិសុខនៅតំបន់ឈូងសមុទ្រ និងប្រជាជនអ៊ីរ៉ង់រាប់លាននាក់។
ទីភ្នាក់ងារសារព័ត៌មានរដ្ឋរបស់ប្រទេសកាតាបានរាយការណ៍ថា រដ្ឋមន្ត្រីការបរទេសអ៊ីរ៉ង់ លោក អាប់បាស អារ៉ាក់ជី (Abbas Araqchi) បានជួបពិភាក្សាជាមួយនាយករដ្ឋមន្ត្រីកាតា លោក សេក ម៉ូហាម៉េដ ប៊ីន អាប់ឌុលរ៉ាម៉ាន់ អាល់ ថានី (Sheikh Mohammed bin Abdulrahman Al Thani) ដែលបានចំណាយពេលជាច្រើនខែមកហើយក្នុងការខិតខំកាត់បន្ថយភាពតានតឹងនៃជម្លោះនេះ។
មន្ត្រីជាន់ខ្ពស់អ៊ីរ៉ង់ម្នាក់បាននិយាយថា ទីក្រុងតេហេរ៉ង់អាចបើកច្រកសមុទ្រហ័រមូសឡើងវិញក្នុងរយៈពេលប៉ុន្មានថ្ងៃខាងមុខ ប្រសិនបើអាមេរិកបន្ធូរបន្ថយសម្ពាធផ្នែកយោធា និងដកការបិទខ្ទប់កំពង់ផែរបស់អ៊ីរ៉ង់។
ជុំវិញករណីនេះដែរ មន្ត្រីជាន់ខ្ពស់អ៊ីរ៉ង់ម្នាក់បានប្រាប់ទីភ្នាក់ងារព័ត៌មានរ៉យទ័រថា ទីក្រុងតេហេរ៉ង់បានបញ្ជូនសំណើថ្មីបំផុតរបស់ខ្លួនទៅកាន់ទីក្រុងវ៉ាស៊ីនតោនតាមរយៈក្រុមអ្នកសម្របសម្រួលកាលពីសប្តាហ៍មុន ហើយអាចបើកច្រកសមុទ្រនោះឡើងវិញសម្រាប់ការដឹកជញ្ជូនតាមផ្លូវសមុទ្រ ក្នុងរយៈពេល ៧ថ្ងៃ ប្រសិនបើការទាមទាររបស់ខ្លួនត្រូវបានឆ្លើយតប។
គួររំលឹកផងដែរថា មកទល់ពេលនេះ អ៊ីរ៉ង់នៅតែរក្សាជំហរដ៏ម៉ឺងម៉ាត់របស់ខ្លួន ដោយប្រធានសភាអ៊ីរ៉ង់ លោក ម៉ូហាម៉ាដ បាហ្គ័រ ហ្គាលីបាហ្វ (Mohammad Baqer Qalibaf) ដែលធ្លាប់ដឹកនាំក្រុមចរចារបស់អ៊ីរ៉ង់នៅក្នុងកិច្ចពិភាក្សាកន្លងមក បានថ្លែងថា អ៊ីរ៉ង់នឹងមិនចុះចាញ់ជាដាច់ខាត ដោយលោកបានបញ្ជាក់ថា លោក ត្រាំ ត្រូវតែយល់ថា លោកមិនអាចប្រើប្រាស់អំណាច ដើម្បីដាក់គំនាបលើប្រជាជនអ៊ីរ៉ង់ និងកងកម្លាំងប្រដាប់អាវុធរបស់អ៊ីរ៉ង់បានឡើយ៕
ប្រែសម្រួលអត្ថបទដោយ៖ លោក អ៊ួច សូនី