UN ថា មានការរីករាលដាលនៃអំពើហិង្សាផ្លូវភេទក្នុងសង្គ្រាមនៅអ៊ុយក្រែន ហើយករណីភាគច្រើនពាក់ព័ន្ធនឹងទាហានរុស្ស៊ី
ការិយាល័យសិទ្ធិមនុស្សអង្គការសហប្រជាជាតិ (UN) បានឱ្យដឹងនៅក្នុងរបាយការណ៍មួយកាលពីថ្ងៃសុក្រថា កងកម្លាំងរុស្ស៊ីបានប្រព្រឹត្តអំពើហិង្សាផ្លូវភេទដ៏រាលដាលលើជនស៊ីវិល និងឈ្លើយសឹកនៅក្នុងប្រទេសអ៊ុយក្រែន រួមទាំងការរំលោភបូក និងការប្រើចរន្តអគ្គិសនីឆក់លើប្រដាប់ភេទ ខណៈអាជ្ញាធរអ៊ុយក្រែនក៏ទទួលខុសត្រូវចំពោះករណីរំលោភបំពានមួយចំនួនតូចផងដែរ។ នេះបើតាមសេចក្តីរាយការណ៍របស់ទីភ្នាក់ងារព័ត៌មានរ៉យទ័រកាលពីថ្ងៃសុក្រ។
របាយការណ៍នេះបានកត់ត្រានូវករណីអំពើហិង្សាផ្លូវភេទដែលពាក់ព័ន្ធនឹងសង្គ្រាមចំនួន ១.០០៤ ករណី ដែលត្រូវបានផ្ទៀងផ្ទាត់ ចាប់ពីខែកុម្ភៈ ឆ្នាំ២០២២ ជាពេលដែលរុស្ស៊ីបានបើកការឈ្លានពានទ្រង់ទ្រាយធំលើអ៊ុយក្រែន រហូតដល់ខែកក្កដា ឆ្នាំ២០២៦។
ក្នុងចំណោមករណីទាំងនោះ ៨៩% ត្រូវបានសន្មត់ថា ពាក់ព័ន្ធនឹងភាគីរុស្ស៊ី រួមទាំងសមាជិកនៃកងកម្លាំងប្រដាប់អាវុធ សេវាពន្ធនាគារ និងភ្នាក់ងារសន្តិសុខ ខណៈ ១១% ទៀតជាប់ពាក់ព័ន្ធនឹងប្រទេសអ៊ុយក្រែន រួមទាំងសមាជិកនៃកងកម្លាំងប្រដាប់អាវុធអ៊ុយក្រែនផងដែរ។
បេសកកម្មការទូតអចិន្ត្រៃយ៍របស់រុស្ស៊ីប្រចាំទីក្រុងហ្សឺណែវ បានបដិសេធមិនធ្វើអត្ថាធិប្បាយជុំវិញរបាយការណ៍នេះទេ។
ទោះបីជាយ៉ាងណា ក្រសួងការបរទេសអ៊ុយក្រែនបានចេញសេចក្តីថ្លែងការណ៍មួយដោយស្វាគមន៍ចំពោះការចេញផ្សាយរបាយការណ៍នេះ ដោយលើកឡើងថា របាយការណ៍នេះ បានបង្ហាញពីកម្រិតនៃការរំលោភសិទ្ធិមនុស្ស ដែលប្រព្រឹត្តឡើងដោយប្រទេសរុស្ស៊ី និងវិធានការនានាដែលអ៊ុយក្រែនកំពុងអនុវត្ត ដើម្បីទប់ស្កាត់អំពើហិង្សាបែបនេះ ព្រមទាំងផ្តល់សំណងដល់ជនរងគ្រោះ ប៉ុន្តែក្រសួងការបរទេសអ៊ុយក្រែន មិនបានធ្វើអត្ថាធិប្បាយដោយផ្ទាល់លើការរកឃើញអំពីករណីនៃការរំលោភបំពានប្រព្រឹត្តដោយកងកម្លាំងអ៊ុយក្រែនឡើយ។
របាយការណ៍ដដែលបានក្រើនរំឭកផងដែរថា ការរកឃើញនេះ មិនមានលក្ខណៈគ្រប់ជ្រុងជ្រោយនៅឡើយទេ ដោយសារតែអំពើហិង្សាផ្លូវភេទពាក់ព័ន្ធនឹងសង្គ្រាមជាច្រើនករណីទៀតមិនត្រូវបានគេរាយការណ៍។
របាយការណ៍បានបន្តថា ការដែលរុស្ស៊ីបដិសេធមិនអនុញ្ញាតឱ្យការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស ចូលទៅកាន់ទឹកដីអ៊ុយក្រែនដែលកំពុងត្រូវបានកាន់កាប់ ក៏ដូចជាចូលទៅជួបអ្នកឈ្លើយសឹក និងជនស៊ីវិលដែលត្រូវបានឃុំខ្លួននោះ មានន័យថា តួលេខទាំងនេះទំនងជាមិនបានឆ្លុះបញ្ចាំងពីកម្រិតពិតប្រាកដនៃការរំលោភបំពាននោះទេ។
របាយការណ៍បានបន្ថែមទៀតថា នៅក្នុងតំបន់ជាច្រើនដែលស្ថិតក្រោមការកាន់កាប់ និងនៅក្នុងប្រទេសរុស្ស៊ី អាជ្ញាធររុស្ស៊ីបានប្រព្រឹត្តអំពើហិង្សាផ្លូវភេទទៅលើអ្នកទោសជនជាតិអ៊ុយក្រែន និងជនស៊ីវិលដែលត្រូវបានឃុំខ្លួន នៅគ្រប់ដំណាក់កាលនៃការឃុំខ្លួន រួមទាំងក្នុងអំឡុងពេលចាប់ខ្លួន ការផ្លាស់ប្តូរទីកន្លែងឃុំខ្លួន ការសួរចម្លើយ និងការឃុំខ្លួន។
ការរំលោភបំពានទាំងនោះរួមមាន ការរំលោភបូក ការចាប់រំលោភ ការកាត់ប្រដាប់បន្តពូជ និងការប្រើចរន្តអគ្គិសនីឆក់លើប្រដាប់បន្តពូជរបស់បុរសជាដើម។ ការរកឃើញទាំងនេះ គឺផ្អែកលើបទសម្ភាសជាមួយជនរងគ្រោះនៃអំពើហិង្សាផ្លូវភេទ ដែលប្រព្រឹត្តឡើងដោយភាគីទាំងសងខាងនៃសង្គ្រាម។
ជនរងគ្រោះភាគច្រើនដែលត្រូវបានឃុំខ្លួនគឺជាបុរស ជាពិសេសគឺឈ្លើយសឹក និងអ្នកដែលត្រូវបានឃុំខ្លួនផ្សេងទៀត ទោះបីជាស្ត្រី និងកុមារក៏រងផលប៉ះពាល់ផងដែរ ដែលភាគច្រើនកើតមាននៅក្នុងតំបន់នៃប្រទេសអ៊ុយក្រែន ដែលស្ថិតក្រោមការកាន់កាប់របស់រុស្ស៊ី។
លោកស្រី ដានីញែល បេល (Danielle Bell) ប្រធានបេសកកម្មអង្គការសហប្រជាជាតិសម្រាប់តាមដានសិទ្ធិមនុស្សប្រចាំនៅអ៊ុយក្រែន បានមានប្រសាសន៍ថា ជារឿយៗ មានការយល់ច្រឡំថា អំពើហិង្សាផ្លូវភេទក្នុងពេលមានសង្គ្រាមប៉ះពាល់ជាចម្បងទៅលើស្ត្រី និងក្មេងស្រី ប៉ុន្តែនៅក្នុងបរិបទនៃសង្គ្រាមនៅអ៊ុយក្រែន ជនរងគ្រោះភាគច្រើនគឺជាបុរស។
របាយការណ៍របស់ UN បានសន្និដ្ឋានថា ប្រទេសរុស្ស៊ីបានបរាជ័យក្នុងការចាត់វិធានការ ដើម្បីទប់ស្កាត់ ស៊ើបអង្កេត ឬចាត់វិធានការផ្លូវច្បាប់ប្រឆាំងនឹងអំពើហិង្សាផ្លូវភេទដែលប្រព្រឹត្តដោយយោធារបស់ខ្លួន ហើយក៏មិនបានឆ្លើយតបទៅនឹងសំណើសុំព័ត៌មានរបស់ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) ផងដែរ៕
ប្រែសម្រួលអត្ថបទដោយ៖ លោក អ៊ួច សូនី