លោក ម៉ាក ខានី គ្រោងបំពេញទស្សនកិច្ចនៅអឺរ៉ុប ដើម្បីពង្រឹងទំនាក់ទំនង ខណៈសង្គ្រាមពាណិជ្ជកម្មជាមួយអាមេរិកកាន់តែធ្ងន់ធ្ងរឡើង
នាយករដ្ឋមន្ត្រីកាណាដា លោក ម៉ាក ខានី (Mark Carney) គ្រោងធ្វើដំណើរទៅកាន់ទីក្រុងស្ត្រាសបឺក (Strasbourg) នៅថ្ងៃពុធនេះ ដោយលោកក្លាយជាមេដឹកនាំរដ្ឋាភិបាលបរទេសដំបូងគេ ដែលចូលរួមស្ដាប់សុន្ទរកថារបស់ប្រធានគណៈកម្មការអឺរ៉ុប ខណៈ លោកកំពុងស្វែងរកភាពជាដៃគូថ្មីៗ ចំពេលមានការគំរាមកំហែងជាបន្តបន្ទាប់ពីសំណាក់ប្រធានាធិបតីអាមេរិក លោក ដូណាល់ ត្រាំ លើអធិបតេយ្យភាពរបស់ប្រទេសកាណាដា។ នេះបើតាមសេចក្តីរាយការណ៍របស់ទីភ្នាក់ងាររ៉យទ័រនៅថ្ងៃទី១៦ ខែកញ្ញា ឆ្នាំ២០២៦នេះ។
លោក ខានី នឹងថ្លែងសុន្ទរកថាទៅកាន់សភាសហភាពអឺរ៉ុប នៅថ្ងៃព្រហស្បតិ៍ ដោយបង្ហាញពីចក្ខុវិស័យរបស់លោកសម្រាប់ “សម្ព័ន្ធភាពពិសេសមួយ” រវាងប្រទេសកាណាដា និងអឺរ៉ុប។
ស្របពេលជាមួយគ្នានេះដែរ នាយករដ្ឋមន្ត្រីកាណាដារូបនេះ បានប្តេជ្ញាបង្កើនទំហំពាណិជ្ជកម្មរបស់ប្រទេសកាណាដាជាមួយប្រទេសនានា ដែលមិនមែនជាសហរដ្ឋអាមេរិក ឱ្យកើនឡើងទ្វេដងក្នុងរយៈពេលមួយទសវត្សរ៍ខាងមុខ ខណៈកាណាដាកំពុងងាកចេញពីប្រទេសជិតខាងនៅភាគខាងត្បូងរបស់ខ្លួន ចំពេលដែលសង្គ្រាមពាណិជ្ជកម្មកាន់តែមានភាពតានតឹងខ្លាំងឡើង។
អ្នកការទូតសហភាពអឺរ៉ុបចំនួន ៧រូប ប្រចាំនៅកាណាដា និងអឺរ៉ុប បានប្រាប់ទីភ្នាក់ងារព័ត៌មានរ៉យទ័រថា មានកិច្ចប្រឹងប្រែងយ៉ាងសកម្មឆ្ពោះទៅរកកិច្ចសហប្រតិបត្តិការកាន់តែស៊ីជម្រៅលើវិស័យពាណិជ្ជកម្ម វិស័យការពារជាតិ និងសន្តិសុខឌីជីថល ប៉ុន្តែមិនទាន់មានកិច្ចពិភាក្សាកម្រិតខ្ពស់អំពីផែនការជាក់លាក់ណាមួយសម្រាប់ទំនាក់ទំនងដ៏ទូលំទូលាយជាងមុនរវាងកាណាដា និងសហភាពអឺរ៉ុបនោះទេ។
ទោះបីជាយ៉ាងណា លោក ខានី បានលើកឡើងកាលពីថ្ងៃអង្គារថា ការពិភាក្សាលម្អិតបន្ថែមទៀតនឹងចាប់ផ្តើមនៅក្នុងកិច្ចប្រជុំកំពូលរវាងកាណាដា និងសហភាពអឺរ៉ុប នៅទីក្រុងម៉ុងត្រេអាល់នាចុងខែតុលា។
ជុំវិញបញ្ហានេះដែរ រដ្ឋមន្ត្រីក្រសួងការបរទេសកាណាដា លោកស្រី អានីតា អាណាន បានប្រាប់ទីភ្នាក់ងាររ៉យទ័រថា ទំនាក់ទំនងរបស់កាណាដាជាមួយសហភាពអឺរ៉ុបកាន់តែមានភាពជិតស្និទ្ធឡើងជាលំដាប់ ជាពិសេសក្នុងរយៈពេល១ឆ្នាំកន្លះកន្លងមកនេះ ហើយសហភាពអឺរ៉ុប គឺតំបន់សំខាន់មួយ ដែលមិនត្រឹមតែមានតម្លៃរួមគ្នាប៉ុណ្ណោះទេ ប៉ុន្តែថែមទាំងមានផលប្រយោជន៍សេដ្ឋកិច្ចរួមគ្នាទៀតផង។
កាលពីសប្តាហ៍មុន កាសែតវ៉លស្ទ្រីតជឺណល (Wall Street Journal) បានរាយការណ៍ថា លោក ខានី បានស្នើទៅកាន់មេដឹកនាំអឺរ៉ុប ដើម្បីឱ្យប្រទេសកាណាដាក្លាយជា “សមាជិករង” របស់សហភាពអឺរ៉ុប។
ប៉ុន្តែទាក់ទិនបញ្ហានេះ អ្នកការទូតសហភាពអឺរ៉ុបចំនួន ៤រូបប្រចាំនៅប្រទេសកាណាដាបានលើកឡើងថា ការដែលកាណាដាអាចក្លាយជាសមាជិកសហភាពអឺរ៉ុប គឺជារឿងដែលមិនអាចទៅរួច ដោយសារតែឧបសគ្គផ្នែកភូមិសាស្ត្រ និងភាពស្មុគស្មាញផ្នែកច្បាប់ដែលសមាជិកនៃសហភាពត្រូវបំពេញ។
គេនៅមើលឃើញថា ឧបសគ្គធំៗនៅបន្តរារាំងដល់កំណើតទំហំពាណិជ្ជកម្មរវាងកាណាដានិងសហភាពអឺរ៉ុប ដោយលោក ម៉ាក មែងហ្គ័រ (Mark Manger) សាស្ត្រាចារ្យផ្នែកសេដ្ឋកិច្ចនយោបាយ និងកិច្ចការសកលនៅសាកលវិទ្យាល័យ Toronto បានលើកឡើងថា មន្ត្រីសហភាពអឺរ៉ុបមានការខកចិត្តចំពោះការបដិសេធរបស់ប្រទេសកាណាដា ក្នុងការបើកចំហវិស័យចំនួនពីរដែលខ្លួនការពារយ៉ាងខ្លាំងក្លានោះ គឺវិស័យទូរគមនាគមន៍ និងវិស័យផលិតផលទឹកដោះគោ៕
អត្ថបទប្រែសម្រួលដោយ៖ លោក អ៊ួច សូនី