អតីតអ្នកស្រាវជ្រាវក្រុមហ៊ុន Anthropic ថាបុគ្គលិកផ្នែក AI មានការភ័យខ្លាចខ្លាំងចំពោះអនាគតរបស់មនុស្សជាតិ
អ្នកស្រាវជ្រាវផ្នែកបញ្ញាសិប្បនិម្មិត (AI) ម្នាក់ ដែលបានលាលែងពីក្រុមហ៊ុនអ៊ែនស្រូភិក (Anthropic) បាននិយាយថា បុគ្គលិកដែលធ្វើការលើបច្ចេកវិទ្យានេះ មានអារម្មណ៍ភ័យខ្លាចយ៉ាងខ្លាំង ចំពោះល្បឿននៃការរីកចម្រើនរបស់បច្ចេកវិទ្យានេះ និងផលប៉ះពាល់ដែលអាចកើតមានចំពោះមនុស្សជាតិ។ នេះបើតាមសេចក្តីរាយការណ៍របស់បណ្តាញព័ត៌មាន BBC កាលពីថ្ងៃអាទិត្យ។
កាលពីថ្ងៃសៅរ៍ លោក ចាកុប ខកសិន (Jacob Coxon) បានប្រាប់អ្នកសារព័ត៌មាន របស់ BBC អំពីការបង្ហោះសារលាលែងពីតំណែងរបស់លោក ដែលបានក្លាយជាប្រធានបទក្តៅនៅលើបណ្ដាញសង្គម ដែលក្នុងនោះលោក ចាកុប ខកសិន បានលើកឡើងពីកង្វល់ទាក់ទងនឹងបញ្ញាសិប្បនិម្មិត (AI) ដែលមិនអាចគ្រប់គ្រងបាន។
នៅក្នុងបទសម្ភាសន៍នេះ លោក ចាកុប បានបង្ហាញការជឿជាក់ថា ប្រសិនបើមិនបន្ថយល្បឿន នៃការអភិវឌ្ឍនាពេលបច្ចុប្បន្ននេះទេ នោះនឹងមានលទ្ធភាពខ្ពស់ ដែលយើងទាំងអស់គ្នាអាចនឹងស្លាប់នៅពេលដ៏ខ្លីខាងមុខ។
គួររំលឹកផងដែរថា ការលាលែងពីតំណែងរបស់លោក ចាកុប បានកើតឡើងចំពេលដែលមានការព្រួយបារម្ភកាន់តែខ្លាំង អំពីសុវត្ថិភាពនៅក្នុងវិស័យបច្ចេកវិទ្យានេះ ដែលក្នុងនោះ លោក ដារីយ៉ូ អាម៉ូដេ (Dario Amodei) ដែលជាប្រធានក្រុមហ៊ុន អ៊ែនស្រូភិក (Anthropic) ក៏បានលើកឡើងនៅក្នុងអត្ថបទមួយថា ការអភិវឌ្ឍបច្ចេកវិទ្យានេះ គួរតែត្រូវបានបន្ថយល្បឿន។
ម្ចាស់ក្រុមហ៊ុន AI ពីរ ដែលជាគូប្រជែងនឹងគ្នា គឺលោក សាំ អាល់មែន (Sam Altman) មកពីក្រុមហ៊ុន OpenAI និងលោក អេឡុន ម៉ាស់ (Elon Musk) មកពីក្រុមហ៊ុន xAI សុទ្ធតែបានថ្លែងថា ខ្លួនយល់ស្របនឹងសំណើរបស់លោក អាម៉ូដេ ដែលបានស្នើឱ្យមានការបន្ថយល្បឿន និងការដាក់ចេញនូវបទប្បញ្ញត្តិសម្រាប់វិស័យនេះទាំងមូល ព្រមទាំងការត្រួតពិនិត្យដោយឯករាជ្យលើការអភិវឌ្ឍគំរូ AI។
បើតាមការលើកឡើងរបស់លោក អាម៉ូដេ ថា ការអភិវឌ្ឍបច្ចេកវិទ្យានេះ មិនមែនជាបញ្ហាទេ ប៉ុន្តែហានិភ័យ ដែលពាក់ព័ន្ធនឹងវា គឺមានលក្ខណៈ “ធ្ងន់ធ្ងរ” ហើយចាំបាច់ត្រូវតែផ្តល់ពេលវេលាឱ្យក្រុមហ៊ុនក៏ដូចជារដ្ឋាភិបាល ដើម្បីដោះស្រាយបញ្ហាទាំងនោះ។
លោក ខកសិន វ័យ២៧ឆ្នាំ ដែលធ្លាប់បម្រើការនៅក្រុមហ៊ុន OpenAI មុនពេលចូលរួមជាមួយក្រុមហ៊ុន Anthropic បានស្វាគមន៍សំណើឱ្យមានការបន្ថយល្បឿន ប៉ុន្តែបានលើកឡើងថា ចាំបាច់ត្រូវមានការសម្របសម្រួលជាមួយប្រទេសចិនផងដែរ ដើម្បីជៀសវាង ការប្រកួតប្រជែងក្នុងកម្រិតអន្តរជាតិ។
លោក ខកសិន បាននិយាយថា បុគ្គលិកដែលធ្វើការនៅក្រុមហ៊ុនទាំងនេះ ពិតជាចង់ឱ្យមានការដាក់ចេញនូវបទប្បញ្ញត្តិពិតប្រាកដមែន ព្រោះពួកគេយល់ថា ខ្លួនកំពុងជាប់ផុងនៅក្នុងការប្រកួតប្រជែងមួយ ហើយពួកគេមានការបារម្ភចំពោះលទ្ធផលនៃការប្រកួតប្រជែងនោះ។
បើតាមលោក ខកសិន សំណួរដែលពិបាកឆ្លើយបំផុតគឺថា តើវិនាសកម្ម ដែលបង្កឡើងដោយ AI នឹងមានលក្ខណៈបែបណា។
ទោះបីជាយ៉ាងណា ហានិភ័យមួយក្នុងចំណោមហានិភ័យដែលបានលើកឡើងនៅក្នុងបទអត្ថាធិប្បាយរបស់លោក អាម៉ូដេ គឺលទ្ធភាពនៃបណ្តុំកម្មវិធីកុំព្យូទ័រ ដែលធ្វើការដោយស្វ័យប្រវត្តិនោះ អាចដំណើរការរួមគ្នាប្រៀបដូចជាកុំព្យូទ័រដ៏មានអានុភាពខ្លាំងក្លាមួយ ដែលអាចគ្រប់គ្រងបណ្តាញអ៊ីនធឺណិតបាន។
ដោយលោក ខកសិន លើកឡើងថា ស្ថានភាពបែបនេះអាចនឹងក្លាយជាការពិតក្នុងរយៈពេលពី ៦ ខែទៅមួយឆ្នាំទៀត។
ដើម្បីឆ្លើយតបទៅនឹងការចាកចេញរបស់លោក ខកសិន អ្នកនាំពាក្យរបស់ក្រុមហ៊ុន Anthropic បានប្រាប់បណ្តាញព័ត៌មាន BBC ថា ក្រុមហ៊ុនរបស់លោកតែងតែបង្ហាញតម្លាភាពថា បច្ចេកវិទ្យា AI នឹងនាំមកនូវទាំងអត្ថប្រយោជន៍ដ៏មហាសាល និងហានិភ័យដែលមិនធ្លាប់មានពីមុនមកផងដែរ។
អ្នកនាំពាក្យរូបនេះ បន្តថា ដើម្បីដោះស្រាយហានិភ័យទាំងនេះ ក្រុមហ៊ុនបន្តបង្កើតគំរូផ្សេងៗ ដោយមានវិធានការការពារដ៏រឹងមាំបំផុតមួយចំនួននៅក្នុងវិស័យនេះ ហើយថា ក្រុមហ៊ុនរបស់លោក គឺជាអ្នកត្រួសត្រាយផ្លូវក្នុងការសិក្សាអំពីរបៀបដែលគំរូ AI ដំណើរការ។ លើសពីនេះទៅទៀត ក្រុមហ៊ុន Anthropic គឺជាស្ថាប័នដំបូងគេ ដែលបានចេញផ្សាយក្របខ័ណ្ឌសម្រាប់កាត់បន្ថយហានិភ័យ ដែលកើតចេញពីការអភិវឌ្ឍបច្ចេកវិទ្យានេះ និងបានធ្វើតេស្តគំរូយ៉ាងម៉ត់ចត់ និងផ្សព្វផ្សាយលទ្ធផលទាំងនោះ ដើម្បីជួយសម្រួលដល់ការត្រួតពិនិត្យ និងទប់ស្កាត់បញ្ហានៃភាពមិនស្របគ្នានៃគោលដៅរបស់ AI ផងដែរ៕
អត្ថបទប្រែសម្រួលដោយ៖ លោក អ៊ួច សូនី