អាមេរិកបញ្ជូននាវាផ្ទុកយន្តហោះចម្បាំងទី៣ទៅតំបន់មជ្ឈិមបូព៌ា ចំពេលមានភាពជាប់គាំងក្នុងសង្គ្រាមជាមួយអ៊ីរ៉ង់
អាមេរិកកំពុងបញ្ជូននាវាផ្ទុកយន្តហោះចម្បាំងទីបីទៅកាន់តំបន់មជ្ឈិមបូព៌ា ខណៈប្រធានាធិបតី ដូណាល់ ត្រាំ បានព្រមានថា ការវាយប្រហារថ្មីៗ លើប្រទេសអ៊ីរ៉ង់អាចនឹងកើតឡើង។ នេះបើតាមសេចក្តីរាយការណ៍របស់បណ្តាញសារព័ត៌មាន The Guardian នៅថ្ងៃទី០២ ខែតុលានេះ។
ការដាក់ពង្រាយកងកម្លាំងនេះ ដែលរួមបញ្ចូលទាំងក្រុមប្រយុទ្ធពិសេស បានឆ្លុះបញ្ចាំងឱ្យឃើញពីសភាពការណ៍ ដែលកំពុងប្រែប្រួលយ៉ាងឆាប់រហ័សនៃសង្គ្រាមរបស់លោក ត្រាំ ប្រឆាំងនឹងប្រទេសអ៊ីរ៉ង់ នៅចំពេលដែលការបោះឆ្នោតពាក់កណ្តាលអាណត្តិនៅសហរដ្ឋអាមេរិកកំពុងខិតជិតមកដល់។
លោក ត្រាំ បានគំរាមថា ការបង្កើនកម្រិតធ្វើសង្គ្រាម ក្រោយការបោះឆ្នោតពាក់កណ្តាលអាណត្តិ នៅតែជាជម្រើសដែលអាចធ្វើទៅបាន ទោះបីជាមានការសន្យាដំបូងរបស់លោកថា សង្គ្រាមនឹងអូសបន្លាយច្រើនសប្តាហ៍ក៏ដោយ។
ក្រុមនាវាដែលកំពុងធ្វើដំណើរទៅកាន់តំបន់មជ្ឈិមបូព៌ានាពេលនេះ មានផ្ទុកកងនាវិកជាង ៧ពាន់នាក់ និងកងម៉ារីន ២ពាន់នាក់។ ក្រុមនេះរួមមានក្រុមវាយប្រហារដឹកនាំដោយនាវាផ្ទុកយន្តហោះ USS Theodore Roosevelt និងក្រុមត្រៀមប្រតិបត្តិការវាយបុកច្រាំងនៅលើនាវា USS Makin Island ព្រមទាំងនាវាវាយបុកច្រាំងចំនួនពីរគ្រឿងផ្សេងទៀត។
យោងតាមមន្ត្រីអាមេរិកម្នាក់ដែលបានថ្លែងក្នុងលក្ខខណ្ឌមិនបញ្ចេញឈ្មោះថា នាវាដឹកយន្តហោះចម្បាំងចំនួន ៣គ្រឿងនឹងមកដល់តំបន់នេះនៅដើមខែតុលា។
ដោយសារមានកងកម្លាំងស្រាប់នៅក្នុងតំបន់មជ្ឈិមបូព៌ា ការផ្លាស់ប្តូរនេះនឹងធ្វើឱ្យចំនួនវត្តមានកងទ័ពជើងទឹកអាមេរិកកើនឡើងដល់កម្រិតខ្ពស់មិនធ្លាប់មាន ដោយមានទាំងនាវិក និងកងម៉ារីនជាង ២ម៉ឺននាក់ ព្រមទាំងយន្តហោះរាប់រយគ្រឿង។
កាលពីខែមេសា កងទ័ពជើងទឹកអាមេរិកធ្លាប់ដាក់ពង្រាយនាវាចម្បាំងផ្ទុកយន្តហោះចំនួនបីក្រុមនៅក្នុងតំបន់មជ្ឈិមបូព៌ា ជាលើកដំបូងហើយចាប់តាំងពីឆ្នាំ២០០៣មក។
នាវាផ្ទុកយន្តហោះចម្បាំង USS George H.W. Bush និង USS George Washington កំពុងស្ថិតនៅក្នុងតំបន់មជ្ឈឹមបូព៌ានៅពេលនេះ រួមជាមួយនឹងក្រុមត្រៀមប្រតិបត្តិការវាយឡើងគោកដែលដឹកនាំដោយនាវា USS Boxer។
ជាធម្មតា នាវា Washington ត្រូវបានដាក់ពង្រាយទៅកាន់មហាសមុទ្រប៉ាស៊ីហ្វិក ប៉ុន្តែវាត្រូវបានបញ្ជូនទៅកាន់តំបន់មជ្ឈិមបូព៌ា ដើម្បីជំនួសនាវា USS Abraham Lincoln ដែលការដាក់ពង្រាយរបស់នាវានេះមានការលំបាក ដោយធ្វើឱ្យក្រុមនាវិកត្រូវស្ថិតនៅកណ្តាលសមុទ្ររយៈពេលជាង២៦០ថ្ងៃជាប់ៗគ្នា។
វាអាចថា នាវា Washington នឹងផ្លាស់ទីទៅកាន់ដែនសមុទ្រក្បែរប្រទេសជប៉ុន នៅពេលដែលក្រុមនាវាផ្ទុកយន្តហោះ Theodore Roosevelt មកដល់។
បើតាមបទសម្ភាសន៍ជាមួយទស្សនាវដ្ដី Time ដែលត្រូវបានចេញផ្សាយកាលពីថ្ងៃព្រហស្បតិ៍ លោក ត្រាំ បានលើកឡើងពីលទ្ធភាពនៃការវាយប្រហារថ្មីៗទៀត ដោយនិយាយថា វា “អាចទៅរួច” ដែលក្នុងនោះ លោកនឹងបង្កើនការទម្លាក់គ្រាប់បែកទៅលើប្រទេសអ៊ីរ៉ង់ បន្ទាប់ពីការបោះឆ្នោតពាក់កណ្តាលអាណត្តិនៅថ្ងៃទី៣ ខែវិច្ឆិកាខាងមុខ។ ទោះបីជាយ៉ាងណា លោក ត្រាំ បដិសេធមិនផ្តល់ព័ត៌មានលម្អិតអំពីយុទ្ធសាស្ត្រនៃការវាយប្រហារនេះទេ។
ដោយលោកបានបន្ថែមថា លោកបានបដិសេធសំណើបទឈប់បាញ់ថ្មីបំផុតរបស់អ៊ីរ៉ង់រួចហើយ ពីព្រោះអ្វីដែលលោកមិនបានយល់ស្របកាលពីមួយឆ្នាំមុននោះ លោកនឹងមិនឱ្យមាននៅថ្ងៃនេះទេ។
លោកថា សំណើរបស់អ៊ីរ៉ង់ គឺដើម្បីបើកច្រកហ័រមូស ដែលជាច្រកដឹកជញ្ជូនប្រេងដ៏សំខាន់ ប៉ុន្តែលោកថា ជារួម សំណើនេះមិនល្អគ្រប់គ្រាន់នោះទេ។
ដោយលោក ត្រាំ ទទួលស្គាល់ថា ការធ្វើសង្គ្រាមនេះ អាចនឹងប៉ះពាល់សំឡេងឆ្នោតសម្រាប់គណបក្សរបស់លោកនៅក្នុងខែវិច្ឆិកា ប៉ុន្តែលោកថា អ៊ីរ៉ង់នឹងមិនអាចមានអាវុធនុយក្លេអ៊ែរទេ ហើយលោកជឿថា ប្រជាពលរដ្ឋ១០០ភាគរយមិនចង់ឱ្យអ៊ីរ៉ង់មានអាវុធនុយក្លេអ៊ែរ រួមទាំងពិភពលោកទាំងមូលផងដែរ៕
ប្រែសម្រួលអត្ថបទដោយ៖ លោក អ៊ួច សូនី
