អាមេរិក និងអ៊ីរ៉ង់ ពិភាក្សាដាច់ដោយឡែកជាមួយក្រុមអ្នកសម្របសម្រួល ក្នុងកិច្ចខិតខំប្រឹងប្រែងថ្មី ដើម្បីបញ្ចប់សង្គ្រាម
មន្ត្រីអាមេរិក និងអ៊ីរ៉ង់បានជួបពិភាក្សាដាច់ដោយឡែកពីគ្នាជាមួយក្រុមអ្នកសម្របសម្រួលកាលពីថ្ងៃចន្ទ ដែលជាផ្នែកមួយនៃកិច្ចខិតខំប្រឹងប្រែងថ្មីទៀត ដើម្បីបញ្ចប់សង្គ្រាមរយៈពេល ៧ខែមកនេះ។ នេះបើតាមសេចក្តីរាយការណ៍របស់ទីភ្នាក់ងារព័ត៌មានរ៉យទ័រកាលពីថ្ងៃចន្ទ។
មន្ត្រីម្នាក់ដែលបានទទួលព័ត៌មានអំពីការចរចានេះបានប្រាប់ទីភ្នាក់ងារព័ត៌មានរ៉យទ័រថា ការពិភាក្សាបន្ថែមទៀតត្រូវបានគេរំពឹងថា នឹងផ្តោតលើសំណៅកែប្រែថ្មី នៃសំណើចរចា ដែលប្រើរយៈពេល៧ថ្ងៃ ហើយដែលអ៊ីរ៉ង់បានដាក់ជូនកាលពីសប្តាហ៍មុននៅក្រៅកិច្ចប្រជុំមហាសន្និបាតអង្គការសហប្រជាជាតិនោះ។
គួររំលឹកថា សង្គ្រាមបានចាប់ផ្តើមកាលពីចុងខែកុម្ភៈ ដោយសារការវាយប្រហាររបស់សហរដ្ឋអាមេរិក និងអ៊ីស្រាអែលទៅលើប្រទេសអ៊ីរ៉ង់ ដែលបានបណ្តាលឱ្យមនុស្សរាប់ពាន់នាក់ស្លាប់ក្នុងរយៈពេល ៧ខែ និងធ្វើឱ្យទីផ្សារពិភពលោកមានភាពរង្គោះរង្គើ ខណៈដែលផ្លូវទឹកសំខាន់ៗសម្រាប់ការដឹកជញ្ជូនប្រេងនៅតែត្រូវបានរាំងខ្ទប់។
សហរដ្ឋអាមេរិក និងអ៊ីរ៉ង់ធ្លាប់បានព្រមព្រៀងគ្នាពីរលើករួចមកហើយលើបទឈប់បាញ់នៅក្នុងកិច្ចចរចាសន្តិភាព ដែលមានការសម្របសម្រួលពីភាគីទីបី គឺនៅខែមេសា និងខែមិថុនា។ ប៉ុន្តែកិច្ចព្រមព្រៀងទាំងនោះបានបរាជ័យទៅវិញក្នុងរយៈពេលដ៏ខ្លី។
យោងតាមទីភ្នាក់ងារព័ត៌មានរដ្ឋ IRNA របស់អ៊ីរ៉ង់បានឱ្យដឹងថា រដ្ឋមន្ត្រីការបរទេសអ៊ីរ៉ង់ លោក អាប់បាស់ អារ៉ាកជី (Abbas Araqchi) ដែលបានបន្តស្នាក់នៅទីក្រុងញូវយ៉កក្រោយបញ្ចប់ការចូលរួមកិច្ចប្រជុំមហាសន្និបាតអង្គការសហប្រជាជាតិ បានថ្លែងថា អ៊ីរ៉ង់រំពឹងថា នឹងទទួលបានការឆ្លើយតបពីសហរដ្ឋអាមេរិកចំពោះសំណើថ្មីបំផុតរបស់ខ្លួនស្តីពីបទឈប់បាញ់ និងលក្ខខណ្ឌនានាសម្រាប់ការស្តារឡើងវិញនូវការធ្វើដំណើររបស់នាវាចរណ៍នៅច្រកសមុទ្រហ័រមូស។
លោក អារ៉ាកជី បាននិយាយថា ប្រសិនបើភាគីអាមេរិកអះអាងថា ពួកគេកំពុងស្វែងរកកិច្ចព្រមព្រៀង ឬដំណោះស្រាយដោយសន្តិវិធីនោះ អ៊ីរ៉ង់បានបង្ហាញដំណោះស្រាយនេះ រួចហើយ។
ជុំវិញបញ្ហានេះ មន្ត្រីអាមេរិកបានពិភាក្សាដាច់ដោយឡែកពីគ្នាជាមួយអ្នកសម្រុះសម្រួលកាលពីថ្ងៃចន្ទ។ ដោយឡែក ប្រធានាធិបតីអាមេរិក លោក ដូណាល់ ត្រាំ ក៏បានប្រាប់អ្នកសារព័ត៌មាននៅសេតវិមានអំពីកិច្ចពិភាក្សានេះ ដោយមិនផ្តល់ព័ត៌មានលម្អិតបន្ថែមនោះទេ។
ផែនការចរចាដែលកំណត់រយៈពេល៧ថ្ងៃរបស់អ៊ីរ៉ង់ រួមមាន៖ បញ្ចប់រាល់អរិភាពនៅក្នុងប្រទេសអ៊ីរ៉ង់ និងលីបង់ បញ្ឈប់ការបង្កកទ្រព្យសម្បត្តិរបស់អ៊ីរ៉ង់ដែលមានទឹកប្រាក់រាប់ពាន់លានដុល្លារ ដកទណ្ឌកម្មលើការលក់ប្រេងរបស់អ៊ីរ៉ង់ និងបញ្ចប់ការបិទខ្ទប់កំពង់ផែរបស់អ៊ីរ៉ង់។
បន្ទាប់មក អ៊ីរ៉ង់នឹងអនុញ្ញាតឱ្យបើកឡើងវិញនូវច្រកសមុទ្រហ័រមូស ដែលជាផ្លូវដឹកជញ្ជូនដ៏សំខាន់សម្រាប់នាវាដឹកប្រេង ហើយភាគីទាំងពីរក៏នឹងបន្តកិច្ចពិភាក្សាឡើងវិញអំពីកម្មវិធីនុយក្លេអ៊ែររបស់អ៊ីរ៉ង់ និងគោលបំណងរបស់លោក ត្រាំ ក្នុងការដកហូត ឬលុបបំបាត់សារធាតុអ៊ុយរ៉ាញ៉ូម ដែលអ៊ីរ៉ង់ចម្រាញ់បានក្នុងកម្រិតខ្ពស់។
លោក ត្រាំ បានថ្លែងកាលពីថ្ងៃសៅរ៍ថា លោកបានបដិសេធសំណើរបស់ប្រទេសអ៊ីរ៉ង់ ដោយលើកឡើងថា អ៊ីរ៉ង់ចង់បានកិច្ចព្រមព្រៀងមួយយ៉ាងឆាប់រហ័ស ដោយសារតែរងសម្ពាធសេដ្ឋកិច្ចដ៏ធ្ងន់ធ្ងរ ដែលប្រទេសនេះ កំពុងប្រឈម។
ប៉ុន្តែកាលពីថ្ងៃអាទិត្យ លោកបានប្រាប់សារព័ត៌មានអ៊ែកស៊ីអូស (Axios) ដោយបង្ហាញក្តីរំពឹងថា អ្នកចរចារបស់សហរដ្ឋអាមេរិកនឹងចូលរួមនៅក្នុងកិច្ចពិភាក្សាបន្ថែមទៀតនៅសប្តាហ៍នេះ។
ទោះជាយ៉ាងណា លោក អារ៉ាកជី រដ្ឋមន្ត្រីការបរទេសអ៊ីរ៉ង់ បានថ្លែងកាលពីថ្ងៃអាទិត្យផងដែរថា ភាគីសម្របសម្រួលមិនទាន់បានជូនដំណឹងជាផ្លូវការអំពីការបដិសេធរបស់សហរដ្ឋអាមេរិកនៅឡើយទេ ហើយអ៊ីរ៉ង់កំពុងរង់ចាំជំហរច្បាស់លាស់របស់ទីក្រុងវ៉ាស៊ីនតោន មុននឹងសម្រេចចិត្តលើជំហានបន្ទាប់របស់ខ្លួន។
លោក អារ៉ាកជី បានលើកឡើងកាលពីថ្ងៃអាទិត្យថា លក្ខខណ្ឌរបស់អ៊ីរ៉ង់មានភាពច្បាស់លាស់ ហើយរាល់ចំណាត់ការឆ្ពោះទៅរកការបើកច្រកសមុទ្រហ័រមូស ឡើងវិញ គឺអាស្រ័យលើការបំពេញតាមលក្ខខណ្ឌទាំងនេះ ដោយលោកបានបន្ថែមថា មានតែដំណោះស្រាយតាមរយៈការចរចាប៉ុណ្ណោះ ទើបអាចដោះស្រាយភាពជាប់គាំងនេះបាន៕
ប្រែសម្រួលអត្ថបទដោយ៖ លោក អ៊ួច សូនី