អាមេរិកគំរាមមិនបញ្ចេញប្រេងម៉ាស៊ូតរបស់ខ្លួនទៅកាន់ទីផ្សារអឺរ៉ុប បើបារាំងនិងអាល្លឺម៉ង់មិនបញ្ចេញស្តុកប្រេងម៉ាស៊ូតរបស់ខ្លួន
យោងតាមប្រភពព័ត៌មានបីនាក់ ដែលបានដឹងពីកិច្ចពិភាក្សានេះបានឱ្យដឹងថា រដ្ឋបាលរបស់លោក ត្រាំ បានស្នើឱ្យប្រទេសអាល្លឺម៉ង់ និងបារាំង បញ្ចេញស្តុកប្រេងម៉ាស៊ូតសម្រាប់ប្រើប្រាស់ក្នុងគ្រាអាសន្ន ដើម្បីជួយសម្រាលបញ្ហាតម្លៃប្រេងឥន្ធនៈសកល ដែលកំពុងកើនឡើងខ្ពស់ បើមិនដូច្នោះទេ អាចប្រឈមនឹងលទ្ធភាពដែលសហរដ្ឋអាមេរិកនឹងហាមការនាំចេញប្រេងម៉ាស៊ូតទៅកាន់ទីផ្សារ។ នេះបើតាមសេចក្តីរាយការណ៍របស់ទីភ្នាក់ងាររ៉យទ័រកាលពីថ្ងៃព្រហស្បតិ៍។
ការព្រមានរបស់អាមេរិកនៅពេលនេះ បង្ហាញពីការកើនឡើងនៃសម្ពាធមកលើតំបន់អឺរ៉ុប ខណៈប្រធានាធិបតីអាមេរិក លោក ដូណាល់ ត្រាំ កំពុងពិចារណាលើការហាមឃាត់នាំចេញប្រេងម៉ាស៊ូតរបស់អាមេរិក ដើម្បីជួយកាត់បន្ថយការកើនឡើងនៃតម្លៃប្រេងឥន្ធនៈនៅក្នុងស្រុក មុនពេលការបោះឆ្នោតពាក់កណ្តាលអាណត្តិនៅខែវិច្ឆិកាខាងមុខនេះ។
ទំនាក់ទំនងរវាងអឺរ៉ុបនិងទីក្រុងវ៉ាស៊ីនតោនបានធ្លាក់ចុះខ្លាំងនៅក្រោមអាណត្តិរបស់លោក ត្រាំ ដោយសារតែជម្លោះពន្ធគយ និងការខ្វែងគំនិតគ្នាលើការចំណាយផ្នែកយោធា។
ទោះបីជាយ៉ាងណា សម្រាប់សហភាពអឺរ៉ុបយល់ថា ការបញ្ចេញស្តុកប្រេងបន្ថែមទៀត គឺជាបញ្ហាដ៏ស្មុគស្មាញមួយ ដោយសារខ្លួនត្រូវថ្លឹងថ្លែងរវាងភាពចាំបាច់ក្នុងការទម្លាក់ថ្លៃប្រេងក្នុងស្រុក និងការរក្សាស្តុកប្រេងឱ្យនៅកម្រិតខ្ពស់ ដើម្បីត្រៀមលក្ខណៈសម្រាប់ករណី ដែលវិបត្តិប្រេងអាចនឹងកាន់តែធ្ងន់ធ្ងរឡើង ប្រសិនបើលោក ត្រាំ និងប្រទេសអ៊ីរ៉ង់ មិនអាចឈានដល់កិច្ចព្រមព្រៀងសន្តិភាព។
អ្នកនាំពាក្យរបស់គណៈកម្មការអឺរ៉ុបបានឱ្យដឹងថា ក្រុមការងារផ្នែកថាមពលរបស់សហភាពអឺរ៉ុប ដែលមានសមាសភាពពីគណៈកម្មការអឺរ៉ុប និងប្រទេសសមាជិកសហភាពអឺរ៉ុបទាំង២៧ នឹងរៀបចំកិច្ចពិភាក្សាតាមទូរស័ព្ទនៅព្រឹកថ្ងៃសុក្រនេះ ដើម្បីពិភាក្សាអំពីស្ថានភាពនេះ។
មន្ត្រីសហភាពអឺរ៉ុបចំនួន២រូបបានប្រាប់ទីភ្នាក់ងារព័ត៌មានរ៉យទ័រថា គណៈកម្មការអឺរ៉ុប ព្រមទាំងប្រទេសអាល្លឺម៉ង់ បារាំង អ៊ីតាលី អង់គ្លេស និងអៀរឡង់ បានធ្វើការសន្ទនាតាមទូរស័ព្ទរួចហើយកាលពីថ្ងៃព្រហស្បតិ៍ ដើម្បីពិភាក្សាអំពីភាពចាំបាច់ក្នុងការបញ្ចេញស្តុកប្រេងម៉ាស៊ូត។
ស្របពេលជាមួយគ្នានេះដែរ ក្រសួងសេដ្ឋកិច្ចរបស់ប្រទេសអាល្លឺម៉ង់បានឱ្យដឹងថា ទីភ្នាក់ងារថាមពលអន្តរជាតិ (IEA) ជាស្ថាប័នត្រួតពិនិត្យវិស័យថាមពលរបស់បណ្តាប្រទេសលោកខាងលិច នៅមិនទាន់ស្នើឱ្យអាល្លឺម៉ង់បញ្ចេញស្តុកថាមពលនៅឡើយទេ។ គេនៅមិនទាន់ច្បាស់ថា តើពេលណាដែលទីភ្នាក់ងារ IEA នឹងបើកកិច្ចប្រជុំលើកក្រោយនោះទេ។
ទីភ្នាក់ងារព័ត៌មានរ៉យទ័របានរាយការណ៍កន្លងមកថា រដ្ឋាភិបាលអាមេរិកមិនពេញចិត្តចំពោះប្រទេសបារាំង និងអាល្លឺម៉ង់ ដោយមន្ត្រីអាមេរិកយល់ឃើញថា ប្រទេសទាំងពីរនេះមិនបានអនុវត្តពេញលេញតាមការសន្យាពីមុនរបស់ខ្លួនក្នុងការបញ្ចេញស្តុកប្រេង និងផលិតផលប្រេងសម្រាប់ប្រើប្រាស់ក្នុងគ្រាអាសន្ននោះទេ។
មន្ត្រីអាមេរិកម្នាក់បានប្រាប់ទីភ្នាក់ងារព័ត៌មានរ៉យទ័រថា វាជាផលប្រយោជន៍ធំរបស់អឺរ៉ុប ក្នុងការសហការជាមួយសហរដ្ឋអាមេរិក ខណៈអាមេរិកស្វែងរកវិធីសាស្ត្រជាច្រើន ដើម្បីបង្កើនការផ្គត់ផ្គង់ផលិតផលប្រេង ដែលបានចម្រាញ់រួច និងកាត់បន្ថយចំណាយសម្រាប់អ្នកប្រើប្រាស់។
ប្រភពព័ត៌មានម្នាក់ទៀត ដែលមានមូលដ្ឋាននៅអឺរ៉ុប បានឱ្យដឹងថា សហរដ្ឋអាមេរិកបានស្នើឱ្យសហភាពអឺរ៉ុបបញ្ចេញប្រេងម៉ាស៊ូតចំនួន១២០លានបារ៉ែលក្នុងរយៈពេល ៦ខែ ខាងមុខ។
គួររំលឹកថា តំបន់អឺរ៉ុបចាប់ផ្តើមពឹងផ្អែកលើប្រេងឥន្ធនៈពីសហរដ្ឋអាមេរិកកាន់តែខ្លាំងឡើង បន្ទាប់ពីហាមឃាត់ការនាំចូលប្រេងពីប្រទេសរុស្ស៊ី ដោយសារការឈ្លានពានរបស់រុស្ស៊ីលើអ៊ុយក្រែន និងបន្ទាប់ពីសង្គ្រាមរវាងសហរដ្ឋអាមេរិក-អ៊ីស្រាអែល ប្រឆាំងនឹងអ៊ីរ៉ង់ បានរំខានដល់ការផ្គត់ផ្គង់ពីតំបន់មជ្ឈិមបូព៌ា។
លោក គ្រីស រ៉ាយ (Chris Wright) រដ្ឋមន្ត្រីក្រសួងថាមពលអាមេរិក បានប្រាប់បណ្តាញព័ត៌មាន Fox News កាលពីថ្ងៃព្រហស្បតិ៍ថា លោកមានទំនុកចិត្តខ្ពស់ថាអឺរ៉ុបអាចកាត់បន្ថយតម្លៃប្រេងឥន្ធនៈបាន ដោយការប្រើប្រាស់ស្តុកប្រេងម៉ាស៊ូតសម្រាប់គ្រាអាសន្ន៕
ប្រែសម្រួលអត្ថបទដោយ៖ លោក អ៊ួច សូនី
