ប្រភពមួយចំនួនថា ចិនកំពុងជំរុញឱ្យអ៊ីរ៉ង់ជួយទប់ស្កាត់ក្រុមហ៊ូទី បន្ទាប់ពីមានការអំពាវនាវពីអារ៉ាប៊ីសាអូឌីត
ប្រភពមួយចំនួន បានឱ្យដឹងថា ប្រទេសចិនបានស្នើសុំជាឯកជនឱ្យទីក្រុងតេហេរ៉ង់ជួយទប់ក្រុមហ៊ូទីនៅក្នុងប្រទេសយេម៉ែន បន្ទាប់ពីអារ៉ាប៊ីសាអូឌីតបានអំពាវនាវទៅកាន់ទីក្រុងប៉េកាំង ក្រោយពីមានការប៉ះទង្គិចគ្នាជាមួយក្រុមសកម្មប្រយុទ្ធដែលគាំទ្រដោយអ៊ីរ៉ង់ កាលពីសប្តាហ៍មុន។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មានរ៉យទ័រកាលពីថ្ងៃព្រហស្បតិ៍។
ប្រភពព័ត៌មានទាំងនេះ អះអាងថា ទីក្រុងរីយ៉ាដបានងាកទៅសុំជំនួយពីប្រទេសចិន បន្ទាប់ពីក្រុមហ៊ូទីបានវាយលុកយ៉ាងឆាប់រហ័សតាមបណ្តោយឆ្នេរសមុទ្រក្រហម និងជុំវិញច្រកសមុទ្របាបអ៊ែលមែនដេប (Bab el-Mandeb) ដែលសកម្មភាពនេះ បានធ្វើឱ្យការនាំចេញប្រេង និងការដឹកជញ្ជូនរបស់អារ៉ាប៊ីសាអូឌីតតាមផ្លូវសមុទ្រ ប្រឈមនឹងហានិភ័យកាន់តែខ្លាំង។
ប្រភពដដែល បន្ថែមថា ប្រទេសចិនបានអំពាវនាវជាសាធារណៈឱ្យមានការអត់ធ្មត់ ការសន្ទនា និងការស្តារឡើងវិញនូវការធ្វើនាវាចរណ៍ដោយសុវត្ថិភាព ប៉ុន្តែសារដែលចិនបានបញ្ជូនជាលក្ខណៈឯកជននោះ គឺមានខ្លឹមសារលើសពីអ្វីដែលបានថ្លែងជាសាធារណៈ។
ទីក្រុងប៉េកាំង ចង់ឱ្យអ៊ីរ៉ង់ប្រើប្រាស់ឥទ្ធិពលរបស់ខ្លួនទៅលើក្រុមហ៊ូទី ដើម្បីជួយទប់ស្កាត់កុំឱ្យជម្លោះនេះរីករាលដាលបន្ថែមទៀតទៅលើច្រកដឹកជញ្ជូនថាមពល ដែលប្រទេសចិន ជាមហាអំណាចសេដ្ឋកិច្ចធំជាងគេទីពីររបស់ពិភពលោក ពឹងផ្អែកលើនោះ។
ប្រភពព័ត៌មានដែលនិយាយក្នុងលក្ខខណ្ឌមិនបញ្ចេញឈ្មោះ មិនបានផ្តល់ព័ត៌មានលម្អិតអំពីរបៀបដែលសារនោះត្រូវបានបញ្ជូន ឬថា តើវាត្រូវបានបញ្ជូនក្នុងអំឡុងពេលនៃដំណើរទស្សនកិច្ចរបស់រដ្ឋមន្ត្រីការបរទេសអ៊ីរ៉ង់ លោក អាប់បាស អារ៉ាកជី (Abbas Araqchi) ទៅកាន់ប្រទេសចិនកាលពីថ្ងៃពុធឬយ៉ាងណានោះទេ។
ប្រភពដដែល បន្តឱ្យដឹងថា ការឆ្លើយតបរបស់ទីក្រុងតេហេរ៉ង់ គឺថា ស្ថិរភាព និងសន្តិភាពនៅក្នុងតំបន់ អាស្រ័យលើការបញ្ចប់សង្គ្រាមរបស់សហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់។
ដោយឡែក ប្រភពព័ត៌មានបីនៅអ៊ីរ៉ង់បានឱ្យដឹងថា មន្ត្រីចិនមិនបានចេញការគំរាមកំហែងណាមួយច្បាស់លាស់ ឬបង្ហាញថា ទីក្រុងប៉េកាំងនឹងព្យាយាមដាក់សម្ពាធផ្នែកសេដ្ឋកិច្ចលើទីក្រុងតេហេរ៉ង់នោះទេ ប្រសិនបើក្រុងតេអេរ៉ង់ខកខានមិនបានប្រើប្រាស់ឥទ្ធិពលរបស់ខ្លួនទៅលើក្រុមហ៊ូទី។
ឆ្លើយតបនឹងសំណើរបស់ទីភ្នាក់ងារព័ត៌មាន រ៉យទ័រ ដែលសុំការអត្ថាធិប្បាយលើរឿងនេះ ក្រសួងការបរទេសចិនបានថ្លែងថា ប្រទេសចិនមិនចង់ឃើញភាពតានតឹងក្នុងតំបន់រាលដាលបន្ថែមទៀតទៅដល់ប្រទេសយេម៉ែន និងសមុទ្រក្រហមនោះទេ។ ការកើនឡើងនៃអស្ថិរភាពក្នុងតំបន់ គឺមិនមែនជាផលប្រយោជន៍របស់ភាគីណាមួយឡើយ។
ក្រសួងការបរទេសចិនបន្តថា អធិបតេយ្យភាព និងសន្តិសុខរបស់ប្រទេសទាំងអស់គួរតែត្រូវបានគោរព ហើយហេដ្ឋារចនាសម្ព័ន្ធសំខាន់សម្រាប់ជីវភាពរស់នៅរបស់ប្រជាជន មិនត្រូវក្លាយជាគោលដៅនៃការវាយប្រហារឡើយ។
ប្រទេសចិន អំពាវនាវឱ្យបញ្ឈប់រាល់សកម្មភាពដែលធ្វើឱ្យស្ថានការណ៍កាន់តែស្មុគស្មាញ និងជំរុញឱ្យមានការដោះស្រាយបញ្ហាតាមរយៈកិច្ចសន្ទនា និងការចរចា។
ទោះជាយ៉ាងណា ក្រសួងការបរទេសអ៊ីរ៉ង់ និងការិយាល័យប្រព័ន្ធផ្សព្វផ្សាយរបស់រដ្ឋាភិបាលអារ៉ាប៊ីសាអូឌីត មិនបានឆ្លើយតបភ្លាមៗចំពោះសំណើសុំការអត្ថាធិប្បាយរបស់ទីភ្នាក់ងារព័ត៌មានរ៉យទ័រសម្រាប់អត្ថបទនេះទេ។
គួររំលឹកថា ប្រទេសចិន គឺជាដៃគូពាណិជ្ជកម្មដ៏ធំបំផុតរបស់អ៊ីរ៉ង់អស់រយៈពេលជាងមួយទសវត្សរ៍មកហើយ និងនៅតែជាអ្នកបញ្ជាទិញប្រេងដ៏សំខាន់របស់ប្រទេសនេះ។
យោងតាមទិន្នន័យ និងការវិភាគពីក្រុមហ៊ុនខេបភ្លើ (Kpler) ការទិញប្រេងរបស់ចិនបានគ្របដណ្តប់លើសពី ៨០% នៃការនាំចេញប្រេងតាមផ្លូវសមុទ្ររបស់អ៊ីរ៉ង់ក្នុងឆ្នាំ ២០២៥ ដោយមានបរិមាណជាមធ្យមប្រហែល ១,៤ លានបារ៉ែលក្នុងមួយថ្ងៃ៕
ប្រែសម្រួលអត្ថបទដោយ៖ លោក អ៊ួច សូនី