អ៊ុយក្រែនចុះកិច្ចព្រមព្រៀងទិញមីស៊ីលការពារដែនអាកាសប្រមាណ ១០០០គ្រាប់ពីសម្ព័ន្ធមិត្ត
រដ្ឋមន្ត្រីក្រសួងការពារជាតិអ៊ុយក្រែន បានឱ្យដឹងកាលពីថ្ងៃអង្គារថា ប្រទេសអ៊ុយក្រែនកំពុងចុះកិច្ចសន្យាទិញមីស៊ីលប្រមាណ ១.០០០គ្រាប់ ជាប្រព័ន្ធការពារអាកាស ដែលផលិតដោយសហរដ្ឋអាមេរិក ក្រោមជំនួយពីប្រទេសជាសម្ព័ន្ធមិត្ត និងតាមរយៈកម្ចីពីសហភាពអឺរ៉ុប។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មានរ៉យទ័រកាលពីថ្ងៃពុធ។
ថ្លែងក្នុងកិច្ចប្រជុំនៃក្រុមទំនាក់ទំនងការពារជាតិអ៊ុយក្រែន លោក យ៉េវហេនី ខ្មារ៉ា (Yevhenii Khmara) ក៏បានលើកឡើងផងដែរថា មីស៊ីលភាគច្រើននឹងត្រូវការពេលវេលាពីរបីឆ្នាំទៀតទើបរួចរាល់ ដូច្នេះលោកបានអំពាវនាវឱ្យមានការផ្តល់ជំនួយបន្ទាន់បន្ថែមទៀត។
នៅក្នុងការអត្ថាធិប្បាយរបស់លោកដែលក្រសួងការពារជាតិយកមកចុះផ្សាយនៅពេលបន្ទាប់ លោក ខ្មារ៉ា បានថ្លែងថា អ៊ុយក្រែនកំពុងស្នើសុំដៃគូលោកខាងលិចឱ្យបញ្ចេញមីស៊ីលការពារដែនអាកាសស្តុកចាស់របស់ខ្លួនបន្ថែមទៀតសិន ហើយដូរយកមីស៊ីលថ្មីត្រឡប់ទៅវិញនៅពេលរួចរាល់ក្រោមប្រព័ន្ធកិច្ចសន្យាដែលបានចុះហត្ថលេខាជាមួយទីក្រុងកៀវ។
លោកបានមានប្រសាសន៍ថា អ៊ុយក្រែនកំពុងមានបញ្ហារាំងស្ទះ ដោយសារកង្វះថវិកាចំនួន ២៧ពាន់លានដុល្លារសម្រាប់ផ្គត់ផ្គង់ដល់ការផលិតដ្រូន។
កំណត់ហេតុសង្ខេបនៃកិច្ចប្រជុំរបស់ក្រសួងការពារជាតិអ៊ុយក្រែន បានឱ្យដឹងទៀតថា លោក ខ្មារ៉ា បានបង្ហាញអំពីផែនការធ្វើសង្គ្រាមរបស់អ៊ុយក្រែន ដែលកំពុងត្រូវបានអនុវត្ត រួមជាមួយនឹងការបង្ហាញនូវបញ្ហាជាច្រើនទៀត ដែលទីក្រុងកៀវចាត់ទុកថា ជាការគំរាមកំហែងធំបំផុតដែលបង្កឡើងដោយទីក្រុងម៉ូស្គូ។
លោក ខ្មារ៉ា បានបញ្ជាក់ថា រុស្ស៊ីមិនទទួលបានផលចំណេញផ្នែកយុទ្ធសាស្ត្រណាមួយទេនៅតាមបណ្តោយខ្សែត្រៀមជួរមុខប្រវែង ១.២០០គីឡូម៉ែត្រ ប៉ុន្តែទីក្រុងមូស្គូកំពុងតែប៉ះប៉ូវបរាជ័យរបស់ខ្លួននៅលើសមរភូមិ ដោយងាកមកប្រព្រឹត្ត “អំពើភេរវកម្មប្រឆាំងនឹងប្រជាជនអ៊ុយក្រែន”។
ប្រទេសរុស្ស៊ី បានចាប់ផ្តើមបើកការវាយប្រហារដោយប្រើប្រាស់ដ្រូន និងមីស៊ីលជាប្រចាំឡើងវិញមកលើទីក្រុងកៀវ កាលពីថ្ងៃអង្គារ បន្ទាប់ពីបានផ្អាកមួយរយៈពេលខ្លី អំឡុងពេលនៃដំណើរទស្សនកិច្ចរបស់ក្រុមអ្នកចរចាសន្តិភាពសហរដ្ឋអាមេរិក។ ក្រុមមន្ត្រីបានឱ្យដឹងថា មនុស្សចំនួន ៥នាក់ ត្រូវបានសម្លាប់នៅក្នុងរដ្ឋធានីកៀវ និងជនរងគ្រោះផ្សេងទៀតនៅតាមតំបន់មួយចំនួន។
អគ្គលេខាធិការអង្គការ NATO លោក ម៉ាក រូតតេ (Mark Rutte) បានថ្លែងនៅក្នុងកិច្ចប្រជុំថា បណ្តាប្រទេសជាសម្ព័ន្ធមិត្តរបស់អ៊ុយក្រែន គ្មានជម្រើសអ្វីផ្សេងក្រៅពីបង្កើនការគាំទ្ររបស់ពួកគេ ដើម្បីជួយឱ្យទីក្រុងកៀវ “អាចចាប់យកឱកាសនានា ដែលខ្លួនកំពុងបង្កើតឡើងនៅពេលនេះនៅគ្រប់សមរភូមិជួរមុខ និងដើម្បីការពារខ្លួនពីការវាយប្រហារតាមផ្លូវអាកាស”៕
អត្ថបទប្រែសម្រួលដោយ លោក អ៊ួច សូនី