សហភាពអឺរ៉ុប ផ្តល់ជំនួយប្រមាណ ១.៨លានដុល្លារ សម្រាប់សកម្មភាពបោសសម្អាតមីននៅកម្ពុជា
សហភាពអឺរ៉ុប បានអនុម័តផ្តល់ជំនួយហិរញ្ញប្បទានឥតសំណងជិត ១.៦លានអឺរ៉ូ (១.៥៩៨.៩៩៩អឺរ៉ូ) ឬស្មើប្រមាណ ១.៨ លានដុល្លារអាមេរិក គាំទ្រសកម្មភាពអង្គភាព CMAC សហការដៃគូជាមួយអង្គការAPOPO ក្នុងការបោសសម្អាតមីននៅខេត្តព្រះវិហារ និងខេត្តឧត្តរមានជ័យ នៃប្រទេសកម្ពុជា។
មជ្ឈមណ្ឌលសកម្មភាពកម្ចាត់មីនកម្ពុជា ហៅកាត់ថា CMAC បានឱ្យតាមរយៈហ្វេសប៊ុករបស់ខ្លួន នៅយប់ថ្ងៃទី២២ ខែកញ្ញា ឆ្នាំ២០២៦នេះថា ការអនុម័តផ្តល់ជំនួយគាំទ្រសកម្មភាពបោសសម្អាតមីនអង្គភាព CMAC សហការដៃគូជាមួយអង្គការAPOPO ដែលមានថវិកាជិត ១.៦លានអឺរ៉ូ ស្មើនឹងប្រមាណ ១.៨លានដុល្លារអាមេរិកនេះ គឺសម្រាប់ប្រតិបត្តិការសម្អាតគ្រាប់យុទ្ធភ័ណ្ឌមិនទាន់ផ្ទុះ នៅខេត្តព្រះវិហារ និងខេត្តឧត្តរមានជ័យ រយ:ពេល១៨ខែ គិតចាប់ពីខែតុលា ឆ្នាំ២០១៦នេះតទៅ។
ប្រភពដដែល បន្តថា ជំនួយនេះ អាចផ្តល់លទ្ធភាពបោសសម្អាតផ្ទៃដីរងផលប៉ះពាល់ប្រមាណជាង៦.០០០ហិកតា ការអប់រំយល់ដឹងពីគ្រោះថ្នាក់ដោយសារមីន និងការងារស្រាវជ្រាវព័ត៌មានកាត់ផ្ទៃដីរងផលប៉ះពាល់ដោយសារសំណល់យុទ្ធភណ្ឌផងដែរ។
ជាមួយគ្នានោះ លោក ហេង រតនា ប្រធានប្រតិភូរាជរដ្ឋាភិបាលទទួលបន្ទុកជាអគ្គនាយកCMAC បានថ្លែងអំណរគុណចំពោះការគាំទ្ររបស់សហភាពអឺរ៉ុប និងបានបញ្ជាក់ពីការប្តេជ្ញាចិត្តរបស់អង្គភាពCMAC ក្នុងការបន្តពង្រឹងភាពជាដៃគូ និងកិច្ចសហប្រតិបត្តិការជាមួយAPOPO និងសហគមន៍អឺរ៉ុប ដើម្បីកម្ចាត់ភាពគំរាមកំហែងដោយសារសំណល់យុទ្ធភណ្ឌសង្គ្រាម កសាងក្តីសង្ឃឹម និងអនាគតរុងរឿងសម្រាប់ប្រជាជនខ្មែរ។
បើតាមមជ្ឈមណ្ឌលកម្ចាត់មីនកម្ពុជា (CMAC) ក្នុងរយៈពេល ៦ខែដើមឆ្នាំ២០២៦នេះ អង្គភាពបាន បោសសម្អាតរំដោះផ្ទៃដីតំបន់គ្រាប់មីន/គ្រាប់បានចំនួន ៧៥.១៣២ហិកតា ស្មើនឹង ៨២ភាគរយ នៃផែនការប្រចាំឆ្នាំ និងរុករកឃើញនិងបំផ្លាញចោលគ្រាប់យុទ្ធភណ្ឌមិនទាន់ផ្ទុះគ្រប់ប្រភេទបានចំនួន២០.៨៦១ គ្រាប់។
ដោយឡែក សម្រាប់ការងារស្រាវជ្រាវព័ត៌មាន និងបោសសម្អាតសំណល់យុទ្ធភណ្ឌសង្គ្រាមសៀមឈ្លានពានក្នុងឆ្នាំ២០២៥ កន្លងទៅ អង្គភាពCMAC បានផ្តោតការយកចិត្តទុកដាក់ខ្ពស់ ក្នុងការចុះប្រតិបត្តិការយ៉ាងសកម្មនៅតាមបណ្តាខេត្តជាប់ព្រំដែនដែលរងផលប៉ះពាល់ទាំង៦ រួមមាន ខេត្តព្រះវិហារ ឧត្តរមានជ័យ បន្ទាយមានជ័យ បាត់ដំបង ពោធិ៍សាត់ និងកោះកុង។
ជាលទ្ធផល បានធ្វើការស្រាវជ្រាវព័ត៌មានចំនួន ៣៣៥ភូមិ ក្នុងចំណោម ៣៤៩ភូមិ ដែលមានផ្ទៃដីរងផលប៉ះពាល់សរុបជិត ៣៨៧.២០៦ហិកតា និងបានរុករកឃេីញ និងកម្ទេចចោលគ្រាប់យុទ្ធភណ្ឌគ្រប់ប្រភេទបានចំនួនជាង ៨.៤០០ គ្រាប់ ក្នុងនោះមានគ្រាប់បែកចង្កោមចំនួន ៤.៤៣៦គ្រាប់៕