ជនសង្ស័យ២នាក់ ផ្លោះរបងរត់ចេញពីតុលាការខេត្តកំពង់ស្ពឺ តែសមត្ថកិច្ចចាប់បានម្នាក់មកវិញ
ជនសង្ស័យម្នាក់ ក្នុងចំណោម ២នាក់ ដែលបានផ្លោះរបងលួចរត់ចេញពីបរិវេណសាលាដំបូងខេត្តកំពង់ស្ពឺ ត្រូវបានចាប់ខ្លួនមកវិញ ខណៈសមត្ថកិច្ចនៅបន្តស្វែងតាមរកចាប់ខ្លួនជនសង្ស័យម្នាក់ទៀតដែលកំពុងរត់គេចខ្លួន។
សេចក្តីបំភ្លឺព័ត៌មានរបស់ស្នងការដ្ឋាននគរបាលខេត្តកំពង់ស្ពឺ ចុះថ្ងៃទី១៧ ខែកញ្ញា ឆ្នាំ២០២៦ បានលើកឡើងថា ជនសង្ស័យក្នុងសំណុំរឿងព្រហ្មទណ្ឌ ២នាក់ បានផ្លោះលួចរត់ចេញពីក្នុងបរវេណសាលាដំបូងខេត្តកំពង់ស្ពឺ កាលពីព្រឹកថ្ងៃទី១៧ ខែកញ្ញា ពេលសមត្ថកិច្ចបញ្ជូនខ្លួនទៅអយ្យការ ដើម្បីសាកសួរតាមនីតិវិធី។
ប្រភពដដែលបន្តថា ជនសង្ស័យទាំងពីរនាក់នោះ ឈ្មោះ វ៉ាន់ វុទ្ធី ភេទប្រុស អាយុ ៣១ឆ្នាំ ត្រូវបានចាប់ខ្លួនពាក់ព័ន្ធនឹងបទប៉ុនប៉ងលួចទ្រព្យសម្បត្តិ និងម្នាក់ទៀតឈ្មោះ ឡេង កែវ ភេទប្រុស អាយុ ២៧ឆ្នាំ ត្រូវបានចាប់ខ្លួនពាក់ព័ន្ធនឹងបទលួច។ ជនសង្ស័ហបានលួចផ្លោះរបងចេញមកក្រៅសាលាដំបូងខេត្ត ដោយមូលហេតុសុំសមត្ថកិច្ចទៅបន្ទប់ទឹក រួចបានត់គេចខ្លួនតែម្តង។
ស្នងការខេត្ត បន្តថា ក្រោយជនសង្ស័យបានរត់គេចខ្លួន កម្លាំងសមត្ថកិច្ចបានសហការ និងតាមប្រមាញ់ចាប់ជនសង្ស័យម្នាក់បានមកវិញ ដែលមានឈ្មោះ វ៉ាន់ វុទ្ធី និងបានបញ្ជូនទៅស្នងការនគរបាលខេត្តកំពង់ស្ពឺ ដើម្បីចាត់ការបន្តតាមនីតិវិធី ខណៈជនសង្ស័យម្នាក់ទៀត ឈ្មោះ ឡេង កែវ សមត្ថកិច្ចកំពុងតែបន្តស្រាវជ្រាវតាមចាប់។ ការណ៍នេះ ស្នងការខេត្តបានអំពាវនាវដល់ប្រជាពលរដ្ឋជួយសហការក្នុងការផ្តល់ព័ត៌មានជូនសមត្ថកិច្ច ដើម្បីឈានទៅឃាត់ខ្លួនជនសង្ស័យដែលលួចរត់នោះ យកមកផ្តន្ទាទោសតាមច្បាប៕