ខេត្តបន្ទាយមានជ័យ ឃាត់ខ្លួនជនបរទេសជាង ៤ពាន់នាក់ ពាក់ព័ន្ធ Scams Online
បន្ទាយមានជ័យ ៖ រដ្ឋបាលខេត្តបន្ទាយមានជ័យ ឲ្យដឹងថា បានបើកប្រតិបត្តិការ ចុះបង្ក្រាបទីតាំងឆបោកតាមប្រព័ន្ធបច្ចេកវិទ្យា Scams Online ជាបន្តបន្ទាប់ ចាប់តាំងពីខែមីនា រហូតដល់ដើមខែឧសភា ឆ្នាំ២០២៦ ឃាត់ខ្លួន ជនបរទេសសរុបជាង ៤,០០០នាក់ (ភាគច្រើនជាជនជាតិចិន, ជនជាតិឥណ្ឌូនេស៊ី និងថៃ)។
ទីតាំងបង្ក្រាប សរុបជាង ១០ទីតាំងធំៗ ស្ថិតក្នុងក្រុងប៉ោយប៉ែត ស្រុកម៉ាឡៃ និងស្រុកអូរជ្រៅ ដែលរួមមានអគារខ្ពស់ៗ បុរី និងសណ្ឋាគារ។
យុទ្ធនាការនេះ សៗត្ងកិច្ច ដកហូតបាន សម្ភារបច្ចេកវិទ្យា និងវត្ថុតាង សម្រាប់បម្រើឱ្យសកម្មភាពឆបោកជាច្រើន។
ការបង្ក្រាបនេះ ធ្វើឡើងតាមបទបញ្ជាលេខ ០១ បប (កក្កដា ២០២៥) និងអនុក្រឹត្យលេខ ០៣ (មករា ២០២៦) របស់រាជរដ្ឋាភិបាល ស្តីពីការគ្រប់គ្រងសន្តិសុខតាមទីតាំងស្នាក់នៅប្រមូលផ្តុំ។
មជ្ឈដ្ឋានមហាជន បានលើកជាចម្ងល់ ចំពោះចំណាត់ការរបស់លោក រាត្រី អភិបាលខេត្តបន្ទាយមានជ័យ ហាក់មានការយឺតយ៉ាវ? ហេតុអ្វីបានជាអាជ្ញាធរខេត្ត មិនបង្ក្រាបបទល្មើសទាំងនេះ ពេលនៅមានទ្រង់ទ្រាយតូច?
តើវាអាចទៅរួចទេ ដែលជនបរទេសរាប់ពាន់នាក់ អាចមកស្នាក់នៅ និងធ្វើសកម្មភាពខុសច្បាប់ក្នុងអគារធំៗកណ្តាលក្រុងនេះ ដោយអាជ្ញាធរមូលដ្ឋាន មិនបានដឹងសោះនោះ?
ចំណុចដែលជាមន្ទិលសង្ស័យរួមមាន៖
១. ការគ្រប់គ្រងស្នាក់នៅ៖ ការហូរចូលនៃជនបរទេសរាប់ពាន់នាក់ ត្រូវតែមានការចុះបញ្ជីស្នាក់នៅច្បាស់លាស់ ហេតុអ្វីទុកឱ្យដល់ថ្នាក់ “ផ្ទុះរឿង” ទើបមានការត្រួតពិនិត្យ?
២. យន្តការបង្ការ៖ បទល្មើស Scams Online មិនមែនកើតឡើងត្រឹមតែមួយថ្ងៃ ឬពីរថ្ងៃនោះទេ វាទាមទារការរៀបចំបណ្តាញអ៊ីនធឺណិត និងសម្ភារបច្ចេកទេសទ្រង់ទ្រាយធំ។
៣. ទំនួលខុសត្រូវភូមិបាល៖ សំណួរត្រូវបានចោទសួរថា តើកន្លងមកមានការ “ធ្វេសប្រហែស” ឬមាន “ការយោគយល់” ណាមួយនៅពីក្រោយសកម្មភាពទាំងនេះ ទើបបណ្តោយឱ្យវារីករាលដាលដល់ថ្នាក់ក្លាយជាមហារីកសង្គមបែបនេះ?
ការបង្ក្រាបនៅពេលនេះ ត្រូវបានគេមើលឃើញថាជា “ការដេញតាមវាយពស់តាមក្រោយ” ច្រើនជាងការបង្ការកុំឱ្យកើតមាន ដែលវាបានធ្វើឱ្យប៉ះពាល់ដល់រូបភាពសន្តិសុខ និងកិត្តិយសរបស់ខេត្តជាប់ព្រំដែនមួយនេះរួចទៅហើយ ៕
