មន្ត្រីមន្ទីរពាណិជ្ជកម្មខេត្តព្រះសីហនុ តម្លៃគ្រឿងសមុទ្រធម្មជាតិស្រស់ៗ លក់កើនតម្លៃបន្តិចបន្តួច ក្នុងបរិបទប្រេងឥន្ទនៈឡើងខ្ពស់
ខេត្តព្រះសីហនុ ៖ លោក ព្រហ្ម វណ្ណដា ប្រធានមន្ទីរពាណិជ្ជកម្ម ខេត្តព្រះសីហនុ បានឲ្យដឹងថា នៅព្រឹកថ្ងៃអង្គារ ទី១៧ ខែមីនា ឆ្នាំ២០២៦នេះ មន្ត្រីមន្ទីរពាណិជ្ជកម្មខេត្តព្រះសីហនុ សហការជាមួយ ក្រុមការងារគ្រប់គ្រងផ្សារលើ បានចុះតាមដានតម្លៃទំនិញប្រើប្រាស់ចាំបាច់ ក្នុងបរិបទប្រេងឥន្ទន:ឡើងថ្លៃ ជាពិសេស គ្រឿងសមុទ្រ រួមមាន៖ ក្តាមសេះ ក្តាមថ្ម បង្គារមងច្រើនប្រភេទ បង្គារចិញ្ចឹម មឹកច្រើនប្រភេទ បង្កងប៉ាក និងគ្រែងជាដើម។
លោកបន្តថា តាមរយ:ការស្រង់តម្លៃពីអាជីវករទាំងអស់ ក្នុងបរិបទវិបត្តិតម្លៃប្រេងឥន្ទន:សកលឡើងថ្លៃនេះ គឺមានទំនិញគ្រឿងសមុទ្រអូសមង និងធម្មជាតិមួយចំនួន បានឡើងថ្លៃក្នុងចន្លោះពី ២០០០រៀល-៥០០០រៀល ក្នុងមួយគីឡូ។ ប៉ុន្តែ សម្រាប់តម្លៃគ្រឿងសមុទ្រចិញ្ចឹម មិនមានការកើនតម្លៃនោះទេ ដូចជា ៖ បង្ការស ក្តាមថ្មចិញ្ចឹម ត្រីតុកកែ និងគ្រែង។
បន្ថែមលើនេះ ក្រុមអាជីវករ ក៏បានលើកឡើងពីបញ្ហាទូកនេសាទមួយចំនួនធំ មិនបានចេញទូកទៅនេសាទទេ ដោយកត្តា ៣យ៉ាងរួមមាន ៖
១. ការផ្លាស់ប្តូរចំណត និងកំពង់ទូក
២. ការកើនតម្លៃប្រេងឥន្ទន: (ម៉ាស៊ូត)
៣. មិនហ៊ានចេញរក ខ្លាចខាត ព្រោះរកមិនគ្រប់ថ្លៃប្រេង។
ក្រុមអាជីវករទាំងនោះ បានបញ្ជាក់ថា ការកើនតម្លៃគ្រឿងសមុទ្រស្រស់ៗនេះ ក៏មិនខុសពីការកើនតម្លៃ ក្នុងរដូវកាលបុណ្យទានប៉ុន្មានដែរ ។ តែកត្តាចម្បង ដែលពួកគាត់លក់មិនសូវដាច់ គឺអតិថិជន (អ្នកទេសចរ) គិតថាគ្រឿងសមុទ្រឡើងថ្លៃខ្ពស់ មិនហ៊ានមកលេង និងមិនសូវមានអតិថិជនអ៊ូអរដូចមុន។ ហើយការលក់ របស់អាជីវករទាំងនោះ គឺអាចលក់កើនតម្លៃ ក្នុងមួយគីឡូ លើសតម្លៃនាំចូល ៤០០០រៀល ទៅ ៥០០០រៀល ប៉ុណ្ណោះ។ ហើយពេលខ្លះ ក៏បានលក់ក្នុងតម្លៃដើម ដើម្បីកុំឲ្យខាត ឬត្រូវខូចទុកចោល។
លោក ព្រហ្ម វណ្ណដា បានស្នើដល់ អ្នកទេសចរ បន្តមកកម្សាន្តនៅខេត្តព្រះសីហនុ ឲ្យបានច្រើន និងចូលទិញម្ហូបអាហារ គ្រឿងសមុទ្រ យកទៅទទួលទាន ឲ្យបានច្រើនដូចពេលមុន ដ្បិតគ្រឿងសមុទ្រ គឺមានតម្លៃសមរម្យនៅឡើយទេ ៕
