ពលរដ្ឋខេត្តព្រះសីហនុ ស្នើឲ្យអាជ្ញាធរ ជួយទប់ស្កាត់ក្លិនស្អុយ ភាយចេញពីរោងចក្រកែឆ្នៃផ្លែស្វាយ នៅក្បែរគល់ស្ពានទឹកសាប ព្រោះប៉ះពាល់ដល់ការរស់នៅ
ខេត្តព្រះសីហនុ ៖ ប្រជាពលរដ្ឋមួយចំនួន រស់នៅខេត្តព្រះសីហនុ បានរអ៊ូរទាំចំពោះក្លិនស្អុយ ដែលសាយភាយចេញពី រោងចក្រកែឆ្នៃផ្លែស្វាយ មួយកន្លែង នៅជាប់ផ្លូវជាតិលេខ៤ ក្បែរស្ពានទឹកសាប សង្កាត់រាម ក្រុងកំពង់សោម ដែលបានបង្កក្លិនស្អុយ នាំឲ្យប៉ះពាល់ដល់សុខភាព ផ្លូវដង្ហើមនិងការប្រកបមុខរបរ របស់ពួកគាត់ធ្ងន់ធ្ងរ។
ប្រជាពលរដ្ឋមួយចំនួន រស់នៅសង្កាត់រាម ក្រុងកំពង់សោម បានឲ្យដឹងនៅថ្ងៃចន្ទ ទី១១ ខែឧសភា ឆ្នាំ២០២៦នេះថា រោងចក្រស្វាយខាងលើនេះ មិនបានទុកដាក់កាកសំណល់ សល់ពីការកែឆ្នៃ ផ្លែស្វាយ របស់ខ្លួន ឲ្យបានត្រឹមត្រូវទេ ដោយមានសាយភាយ ក្លិនស្អុយ ពិបាកដល់ការដកដង្ហើម និងការរស់នៅប្រចាំថ្ងៃ។ ជាងនេះទៀត រោងចក្រនេះ ក៏តែងបានបង្ហូរសារធាតុគីមីស្អុយចូលទៅក្នុងដៃព្រែក ឬដៃសមុទ្រ ដែលប៉ះពាល់ដល់បរិស្ថាន និងជីវចម្រុះ នៅតាមដងព្រែកធ្ងន់ធ្ងរថែមទៀតផង។
ពលរដ្ឋម្នាក់ ស្ថិតក្នុងចំណោមពលរដ្ឋផ្សេងទៀត រស់នៅសង្កាត់រាម បានស្នើដល់អាជ្ញាធរគ្រប់ជាន់ថ្នាក់ ជាពិសេស លោក ម៉ាង ស៊ីណេត អភិបាលខេត្តព្រះសីហនុ និង រដ្ឋមន្ត្រីក្រសួងបរិស្ថាន ឲ្យជួយអន្តរាគមន៍ទៅរោងចក្រស្វាយ មានទីតាំងជាប់ផ្លូវជាតិលេខ៤ ម្តុំខាងកើតគល់ស្ពានទឹកសាប ឲ្យបានឆាប់ផង ដ្បិតបានប៉ះពល់ដល់ការរស់នៅប្រចាំថ្ងៃ និងការប្រកបមុខរបរចិញ្ចឹមជីវិត របស់ពួកគាត់។
លោកឲ្យដឹងដូច្នេះ៖ « ជិះលើផ្លូវជាតិលេខ៤ តាមមុខរោងចក្រស្វាយហ្នឹង គឺក្លិនស្អុយជះពេញមុខរោងចក្រហ្នឹងហ្មង។ ជិះគាត់ដឹងតែធំក្លិនហើយ រោងចក្រស្វាយនៅចំណុច ៩៣ ជិតអូរកំបុត។ ហើយគេបង្ហូរទៅព្រែកខាងក្រោម ដោយដើមឈើងាប់អស់គ្មានសល់ស្លឹកទេ។ ហើយផលប៉ះពាល់ខ្លាំង គឺអ្នកនេសាទ គឺនេសាទអត់បានផលទេ។»
ពលរដ្ឋច្រើនទៀត ក៏បានលើកឡើងពីផលវិបាក នៃការបំពុលបរិស្ថាន ចេញពីរោងចក្រកែឆ្នៃស្វាយនេះដែរ។ ពួកគេ អះអាងថា ការសាយភាយក្លិនស្អុយនេះ គឺពួកគាត់ ក៏ធ្លាប់បានស្នើសុំកិច្ចអន្តរាគមន៍ ទៅអាជ្ញាធរសង្កាត់រាម ច្រើនលើកច្រើនសារ កន្លងមកហើយ ប៉ុន្តែហាក់មិនទទួលបានលទ្ធផលវិជ្ជមានច្រើនទេ។
ឆ្លើយតបបញ្ហានេះ ចៅសង្កាត់រាម លោក គឹម ចាន់ និយាយប្រាប់កាសែតក្នុងស្រុកថា លោកមិនដឹងព័ត៌មាន ជុំវិញក្លិនស្អុយ ភាយចេញពីរោងចក្រស្វាយ ក្នុងមូលដ្ឋាននេះទេ។ ប៉ុន្តែលោកថា នឹងចុះទៅពិនិត្យដល់ទីតាំងរោងចក្រជាក់ស្តែង។
ចំណែក លោក ម៉ើង សុភាព ប្រធានមន្ទីរស្តីទី នៃមន្ទីរបរិស្ថានខេត្តព្រះសីហនុ លើកឡើងថា នឹងបញ្ជូនមន្ត្រីជំនាញឲ្យចុះទៅពិនិត្យដល់រោងចក្រកែឆ្នៃផ្លែស្វាយនេះ ឲ្យបានឆាប់បំ នៅថ្ងៃនេះ ដើម្បីឈានទៅរកដំណោះស្រាយជូនពលរដ្ឋ។
លោកបន្តថា ៖ ៖ « ខ្ញុំ ក៏ទើបទទួលបានព័ត៌មានពាក់ព័ន្ធនឹងរោងចក្រស្វាយ។ អញ្ចឹងរោងចក្រស្វាយ នៅទឹកសាបនេះ ខ្ញុំ នឹងឲ្យក្រុមការងារខ្ញុំ ចុះមើលល្ងាចនេះ។»
ដោយឡែក លោក នួន ប៊ុនថុល អភិបាលក្រុងកំពង់សោម ឲ្យគេហទំព័រ «កម្ពុជាថ្ងៃនេះ» ដឹងនៅថ្ងៃចន្ទនេះថា នឹងចាត់ក្រុមការងារ ឲ្យចុះទៅពិនិត្យជាក់ស្តែង ដល់រោងកចក្រ ដើម្បីរកដំណោះស្រាយជូនពលរដ្ឋ។ លោកថា ករណី ក្លិនស្អុយសាយភាយ ចេញពីរោងចក្រស្វាយនេះ កន្លងមកអាជ្ញាធរ ក៏ធ្លាប់ចុះណែនាំដល់ អ្នកគ្រប់គ្រង រោងចក្រនេះ ម្តងជាពីរដងរួចមកហើយៗ ក៏បានព្រមាន កុំឲ្យការផលិត របស់ខ្លួន នាំឲ្យប៉ះពាល់ដល់ ការរស់នៅ របស់ពលរដ្ឋ នៅជិតរោងចក្រនេះ។
លោកបន្ថែមថា៖ « រោងចក្រស្វាយហ្នឹងខ្ញុំធ្លាប់បញ្ជូនមន្ត្រីចុះពីរបីដងរួចមកហើយ។ ចាំខ្ញុំ ឲ្យមន្ត្រីចុះទៅពិនិត្យមើលទៀត។»
កម្ពុជាថ្ងៃនេះ នៅមិនអាចទាក់ទង លោក ម៉ាង ស៊ីណេត អភិបាលខេត្តព្រះសីហនុ ដើម្បីបំភ្លឺជុំវិញកង្វល់ពលរដ្ឋ លើករណីមានក្លិនស្អុយ ចេញពីរោងចក្រកែឆ្នៃផ្លែស្វាយ នៅសង្កាត់រាម បានទេនៅថ្ងៃចន្ទ ទី១១ ខែឧសភានេះ។ ប៉ុន្តែ លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ បានបញ្ជាក់ថា លោកនឹងប្រាប់ទៅមន្ទីរបរិស្ថាន ដើម្បីបញ្ជូនមន្ត្រីជំនាញ ចុះទៅពិនិត្យជាក់ស្តែងដល់ទីតាំងរោងចក្រ និងឈានទៅមានវិធានការជាក់ស្តែង ឲ្យបានឆាប់បំផុត។
លោកថា ៖ « កន្លែងហ្នឹងដូចជាមន្ត្រីជំនាញបានចុះទៅពិនិត្យមើលមួយសារហើយៗ ក៏បាត់ម្តងហើយ។ ឥឡូវក្លិនជះមកទៀតហើយឬ?។ អាហ្នឹងអាចថា បណ្តាលមកពីបញ្ហាបច្ចេកទេផង ឬមួយក៏កាកសំណល់ស្វាយហ្នឹងផង ដែលមិនទាន់រកវិធីណាមួយ ដើម្បីរំដោះក្លិនហ្នឹងបាន។ បញ្ហាក្លិនជារឿងមួយហើយ និងទី២ តើអាផលប៉ះពាល់របស់វានោះយ៉ាងណា? ដែលវាចេញពីអាងប្រព្រឹត្តិកម្មហើយបង្ហូរទៅទន្លេរ ឬបង្ហូរទៅសមុទ្រហ្នឹវាយ៉ាងម៉េចទៀត?។ រឿងនេះអត់អីទេ ខ្ញុំ នឹងប្រាប់ទៅខាងមន្ត្រីបរិស្ថាន ជូនគាត់ជាព័ត៌មាន ដើម្បីសុំឲ្យគាត់ចាត់ក្រុមកាករងារចុះពិនិត្យមើល តើវាមានផលប៉ះពាល់កំរិតណា? នឹងត្រូវមានវិធានការរបៀបម៉ិចទៀត?។»
ទោះជាបែបនេះក្តី លោក ជិន វណ្ណៈ ប្រធានអង្គការការពារបរិស្ថាន ប្រចាំខេត្តព្រះសីហនុ ឲ្យដឹងថា កន្លងមកអង្គការនេះ ក៏ធ្លាប់បានដាក់លិខិត ស្តីពីការបំពុលបរិស្ថាន ចេញពីរោងចក្រស្វាយខាងលើនេះ ជាច្រើនដងទៅអជ្ញាធរ ប៉ុន្តែហាក់មិនទទួលបានលទ្ធផលសោះ។ លោកបន្តថា ផលប៉ះពាល់ ដែលកើតចេញពីរោងចក្រកែឆ្នៃផ្លែស្វាយ នៅម្តុំជិតគល់ស្ពានទឹកសាបនេះ បានកើតឡើងតាំងពីឆ្នាំ២០១៩មកម៉្លេះ។
[5/11/2026 4:19 PM] ដែន អយុធ្យា: អ្នកឃ្លាំមើលបរិស្ថានរូបនេះ ស្នើដល់ថ្នាក់ដឹកនាំរដ្ឋបាល ខេត្តព្រះសីហនុ ពិសេស រដ្ឋមន្ត្រីក្រសួងបរិស្ថាន ឲ្យជួយអន្តរាគមន៍ ទៅរោងចក្រកែឆ្នៃផ្លែស្វាយនេះ ឲ្យមានចម្រោះទឹកឲ្យបានត្រឹមត្រូវ ដើម្បីបន្សាបជាតិពុល ឬកាកសំណល់ផ្សេងៗ ឲ្យបានល្អជាមុនសិន មុននឹងបង្ហូរចូលទៅសមុទ្រ ឬដៃព្រែក ព្រោះបានជះក្លិនស្អុយ និងប៉ះពាល់ដល់ជីវចម្រុះច្រើនទៀត។
លោកបន្តដូច្នេះ ៖ « ស្នើឲ្យរោងចក្រធ្វើអាងចម្រោះឲ្យបានត្រឹមត្រូវ។ ក្លិនស្អុយហ្នឹងចេញពីសំបកស្វាយ ដែលរោងចក្រដាក់គរចោល នៅក្នុងរោងចក្រ ហើយមានក្លិនស្អុយខ្លាំងណាស់។ សំបកស្វាយហ្នឹងគេបង្ហូរចូលទឹកផង និងគរទុកចោលផង ហើយស្អុយរលួយ។ ក្លិនស្អុយជះចំហាយ ៥រយម៉ែត្របួនជ្រុង នៅជុំវិញបរិវេណក្រុមហ៊ុន។»
ប្រធានអង្គការការពារបរិស្ថានរូបនេះ ឲ្យដឹងទៀតថា ចំពោះរោងចក្រកែច្នៃស្វាយ ឬផ្លែឈើ ដែលជះក្លិនស្អុយនេះ ទំនងអាចមកពីកាកសំណល់សំបកស្វាយ និងផ្លែខូចរលួយ ដែលទឹកសំណល់មានជាតិសរីរាង្គខ្ពស់, ប្រព័ន្ធអាងស្តុកទឹកស្អុយមិនល្អ និងការបង្ហូរទឹកសំណល់មិនល្អ ចូលព្រែក ឬតំបន់ទឹកសាប ទើបមានជះក្លិនស្អុយជាប្រចាំ នាំឲ្យប៉ះពាល់ដល់ការរស់នៅ របស់ប្រជាពលរដ្ឋ ដែលមានផ្ទះរស់នៅជិតៗរោងចក្រនោះ។
លោកបន្ថែមថា ៖ « អញ្ចឹងប្រជាពលរដ្ឋ គាត់រស់នៅជិតរោងចក្រស្វាយហ្នឹងគឺរស់នៅអត់បានទេ ព្រោះក្លិនស្អុយពេក។ ពួកគាត់ថា រោងចក្រធ្វើស្វាយហ្នឹងក៏ធ្វើទៅអត់អីទេ។ តែស្នើត្រូវធ្វើអាងចម្រោះលាងឲ្យស្អាត ឬច្រោះជាតិគីមីឲ្យស្អាត។ ហើយបង្ហូរកាកសំណល់ចូលអាចចម្លោះ ឲ្យបានស្អាតហើយ ចាំបង្ហូរទឹកសំណល់នោះ ចូលទៅក្នុងព្រែក ដើម្បីជៀសវាងប៉ះពាល់ដល់ជីវចម្រុះ។ ខាងអាជ្ញាធរហ្នឹងពីមុនមកដូចជាអត់សូវយកចិត្តទុកដាក់សោះ។ ទៅអើតឡើមៗមួយភ្លេតៗ ទៅមើលហើយវិលមកវិញហើយ គឺអត់ដោះស្រាយឲ្យប្រជាពលរដ្ឋទេ។»
យោងតាមច្បាប់ស្តីពីការការពារ និងគ្រប់គ្រងបរិស្ថាន បានកំណត់ថា មិនអនុញ្ញាតឲ្យបង្ហូរសារធាតុគីមី ឬសារធាតុពុលចូលក្នុងទឹក ឬដី ដោយគ្មានការគ្រប់គ្រងឲ្យបានល្អទេ។ ហើយរោងចក្រសហគ្រាស ត្រូវតែមានប្រព័ន្ធសម្អាតទឹកកខ្វក់ និងត្រូវគោរពស្តង់ដារបរិស្ថានជាដើម។ ចំពោះការបង្ហូរទឹកកខ្វក់ ដោយគ្មានការគ្រប់គ្រងត្រឹមត្រូវ គឺផ្ទុយនឹងច្បាប់។ ហើយអាជ្ញាធរ មានភារកិច្ចត្រួតពិនិត្យ និងចាត់វិធានការច្បាប់។ ជាងនេះទៀត ប្រសិនបើរោងចក្រ ឬសហគ្រាសទាំងនោះ មិនអនុវត្តតាមច្បាប់ទេ នឹងត្រូវពិន័យជាប្រាក់, បិទអាជីវកម្ម ឬទទួលទោសតាមច្បាប់ ៕
