កម្លាំងចម្រុះខេត្តកោះកុង ចុះរុះរើផ្ទះនិងតូបលក់ដូ របស់ពលរដ្ឋជាង ៤០គ្រួសារ នៅតំបន់ជ្រោះដំណាក់ក្បូន ដោយចោទរស់នៅខុសច្បាប់!
ខេត្តកោះកុង ៖ កម្លាំងចម្រុះ នៃរដ្ឋបាលខេត្តកោះកុង កាលពីព្រឹកថ្ងៃអង្គារ ទី៥ ខែឧសភា ឆ្នាំ២០២៦ បានចុះរុះរើផ្ទះនិងតូបលក់ដូរ របស់ប្រជាពលរដ្ឋ ជាង៤០គ្រួសារ ដែលកំពុងរស់នៅ និងប្រកបមុខរបរចិញ្ចឹមជីវិត នៅតំបន់ជ្រោះដំណាក់ក្បូន ស្ថិតក្នុងស្រុកមណ្ឌលសីមា ទាំងបង្ខំ និងព្រមានចាប់ខ្លួន បើពលរដ្ឋណាម្នាក់ហ៊ានចេញមុខតវ៉ា។
ទោះយ៉ាងណា ក្រុមប្រជាពលរដ្ឋ បានសំណូមពរដល់ប្រមុខដឹកនាំរដ្ឋាបាលភិបាល ឲ្យជួយអន្តរាគមន៍ ឲ្យពួកគេបានលក់ដូរ នៅទីតាំងដូចដើមវិញ ដ្បិតពលរដ្ឋ រស់នៅក្នុងមូលដ្ឋាននេះ មានជីវភាពក្រីក្រតោកយ៉ាក ហើយកូនចៅមិនបានចូលសាលារៀនទេ។
ពលរដ្ឋមួយចំនួន រស់នៅតំបន់ជ្រោះដំណាក់ក្បួន ស្ថិតក្នុងភូមិកោះប៉ោ ឃុំប៉ាក់ខ្លង បានឲ្យដឹងថា កាលពីថ្ងៃអង្គារ កម្លាំងចម្រុះ ប្រដាប់ដោយអាវុធ នៃរដ្ឋបាលខេត្តកោះកុង បានចុះរុះរើតូបលក់ដូរ និងផ្ទះរស់នៅ របស់ពួកគាត់បំផ្លាញចោលអស់គ្មានសល់។ ជាងនេះទៀត ក៏បានគម្រាមចាប់ខ្លួនពួកគាត់ដាកគុកច្រវ៉ាក់ថែមទៀត បើហ៊ានចេញមុខតវ៉ា ប្រឆាំងនឹងការរុះរើនេះ។
ផ្តើមពីបញ្ហានេះ ពលរដ្ឋជាច្រើនរូបសំណូមពរដល់ ថ្នាក់ដឹកនាំក្រសួងពាក់ព័ន្ធ ជាពិសេសប្រមុខដឹកនាំរដ្ឋាភិបាល ឲ្យជួយអន្តរាគមន៍ស្នើសុំរស់នៅ និងលក់ដូរនៅកន្លែងដើមវិញ។ ដ្បិតពួកគាត់គ្មានកន្លែងរស់នៅ និងគ្មានកន្លែងប្រកបមុខរបរចិញ្ចឹមជីវិតទេ។
ក្រុមប្រជាពលរដ្ឋ បានអះអាងថា ពួកគាត់បានមករស់នៅតំបន់ជ្រោះដំណាក់ក្បូននេះជិត ១០ឆ្នាំកន្លងមក តាំងពីតំបន់នេះ គ្មានការអភិវឌ្ឍន៍ផ្លូវ និងគ្មានមនុស្សមកដល់ ដ្បិតជាតំបន់ដាច់ស្រយាលឆ្ងាយពីទីក្រុង រាប់សិបគីឡូម៉ែត្រឯណោះ។ ពលរដ្ឋបន្តថា លុះក្រោយមក នៅពេលតំបន់នេះ ត្រូវបានរដ្ឋាភិបាលស្ថាបនាផ្លូវរួចរាល់ ទើបឃើញមានវត្តមាន មន្ត្រីបរិស្ថានចុះមកហាមពួកគាត់ មិនឲ្យរស់នៅតំបន់នេះ និងចោទរស់នៅខុសច្បាប់ទៅវិញ?។
ពលរដ្ឋមានចម្ងល់ថា នៅពេលពួកគាត់ ចូលមករស់នៅតំបន់ជ្រោះដំណាក់ក្បូនថ្មីៗ ហេតុអ្វីមិនដែលឃើញវត្តមាន មន្ត្រីបរិស្ថាន ឬអាជ្ញាធរពាក់ព័ន្ធ ចុះមកហាមឃាត់ពួកគាត់។ ប៉ុន្តែក្រោយពេល ប្រជាពលរដ្ឋពួកគាត់ បាននាំគ្នាសំអាតអនាម័យបរិស្ថានតំបន់ខាងលើនេះ មានអនាម័យ មានបរិស្ថានល្អ និងមានសោភណ្ឌភាព ហើយទាក់ទាញ ភ្ញៀវទេសចរ ចូលមកកម្សាន្តតំបន់នេះជាបន្តបន្ទាប់ ទើបលេចមុខមន្ត្រី ឬអាជ្ញាធរ ចុះមកហាម និងបណ្តេញពួកគាត់ ឲ្យចាក់ចេញពីតំបន់នេះ ទាំងបង្ខំ និងគ្មានដំណោះស្រាយទេ?។
លោក ង៉ែត ស៊ីណាប់ មន្ត្រីសម្របសម្រួលសមាគមអាហុក ប្រចាំខេត្តកោះកុង និយាយថា ចំពោះរាល់ការបណ្តេញណាមួយទាំងបង្ខំ និងមានហិង្សា អាចចាត់ទុកជាការរំលោភសិទ្ធិមនុស្ស។ ហើយករណីពលរដ្ឋ ចូលមករស់នៅក្នុងតំបន់ជ្រោះដំណាក់ក្បូន ខាងលើនេះ អាជ្ញាធរពាក់ព័ន្ធ គួរតែរកដំណោះស្រាយដោយសន្តិវិធីជាមុន។
យ៉ាងណាក៏ដោយចុះ កម្ពុជាថ្ងៃនេះ នៅមិនទាន់អាចស្នើសុំការបំភ្លឺពី លោក ហ៊ុន ម៉ារ៉ាឌី ប្រធានមន្ទីរបរិស្ថាន ខេត្តកោះកុង បានទេ តាមទូរស័ព្ទ នៅរសៀលថ្ងៃអង្គារ ទី០៥ ខែឧសភា។ ប៉ុន្តែលោក ឈិត រតនៈ អ្នកនាំពាក្យ និងជាអភិបាល ខេត្តកោះកុង បាននិយាយថា អាជ្ញាធរ ក៏ធ្លាប់បានចុះទៅណែនាំ ប្រជាពលរដ្ឋ ដែលចូលមកសង់ផ្ទះ ឬសង់តូបលក់ដូរ នៅក្នុងតំបន់ជ្រោះដំណាក់ក្បូននេះ ឲ្យរុះរើផ្ទះចេញពីតំបន់នេះរួចហើយៗ ក៏បានចេញសេចក្តីជូនដំណឹងជាបន្តបន្ទាប់ មិនអនុញ្ញាតិឲ្យពលរដ្ឋ ចូលមករស់នៅតំបន់នេះទេ ព្រោះជាតំបន់អភិរក្សរបស់ក្រសួងបរិស្ថាន។
ទោះយ៉ាងណា ក្រុមប្រជាពលរដ្ឋ បាននិយាយថា ពួកគាត់មិនទាមទារកម្មសិទ្ធិស្របច្បាប់ រស់នៅតំបន់នេះទេ ដោយគ្រាន់តែស្នើសុំរស់នៅបណ្តោះអាសន្ន ដើម្បីប្រកបមុខរបរលក់ដូរម្ហូបអាហារ ជូនភ្ញៀវទេសចរ ដើម្បីរកប្រាក់ចំណូលបន្តិចបន្តួច សម្រាប់ចិញ្ចឹមគ្រួសារ តែប៉ុណ្ណោះ។ ដ្បិតសេដ្ឋកិច្ចគ្រួសារ របស់ពលរដ្ឋពួកគាត់ជាង ៤០គ្រួសារ កំពុងជួបទះការខ្វះខាតផ្នែកជីវៈភាពរស់នៅធ្ងន់ធ្ងរ៕
